काठमाडौं । काठमाडौं र भक्तपुरका विभिन्न स्थानमा आज कुकर बम फेला परेको छ । 

काठमाडौंको जोरपाटी नजिकै नयाँपाटीमा कुकर बम राखेको पाइएपछि नेपाली सेनाको डिस्पोज टोली बोलाइएको थियो भने भक्तपुरको सूर्यविनायक र लोकन्थलीमा आज बिहानै प्रेसर कुकर बम फेला परेको राससले जनाएको छ । नेपाली सेनाको बम डिस्पोज टोलीले दुवै ठाउँमा भेटिएको बम निस्कृय पारेको छ ।

भक्तपुरमा भेटिएका दुवै बम नेपाली सेनाको डिस्पोजल टोलीले डिस्पोज गरेको महानगरीय प्रहरी परिसर भक्तपुरका प्रहरी उपरीक्षक हिमालयकुमार श्रेष्ठले जानकारी दिए ।

काठमाडौंको जोरपाटी नजिकै नयाँपाटीमा फेला परेको बम पनि नेपाली सेनाले निस्क्रिय बनाएको छ । गोकर्णेश्वर–२ नयाँपाटी मुल सडकमै कुकर बम राखिएको थियो । स्थानीयले देखेपछि प्रहरीलाई खबर गरेका थिए । कुकर बममा तार फिट गरेर घडीसमेत राखिएको पाइएको छ । बम फेला परेपछि स्थानीय त्रसित भएका थिए । नयाँपाटीमा फेला परेको बम शक्तिशाली भएको सुरक्षा निकायले जनाएको छ ।

विप्लव नेतृत्वको नेकपाका प्रवक्ता खड्गबहादुर विश्वकर्मा प्रकान्ड पक्राउको विरोधमा सो समूहले आज बन्द आह्वान गरेको छ । काठमाडौं उपत्यकामा भने बन्दको कुनै असर परेको छैन ।