काठमाडौं । राउन्ड टेबल इनटरनेसनलले गोरखाको एक विद्यालयलाई १२ कक्षकोठासहितको २ वटा भवन हस्तान्तरण गरेको छ । संस्थाले ६ वटा अन्तर्राष्ट्रिय क्लबहरुको संयुक्त टोलीलाई संगठित गर्दै सुरु गरेको ‘राउन्ड फर नेपाल’ नामक अभियानमार्फन् गोरखाको पालुङटार नगरपालिकाको अकला माविलाई भवन हस्तान्तरण गरेको हो ।
अभियान सञ्चालन गर्ने संगठनमा राउन्ड टेबल, लेडिज सर्कल, ४१ क्लब, वोको फाउण्डेशन, ट्यान्जेन्ट र अगोरा रहेका छन् । ती संस्था नेपाली समुदायलाई प्राकृतिक विपत्तिको विरुद्ध उभ्याउने एकिकृत लक्ष्यले एक भएका थिए । राउन्ड टेबल नेपाल अल फर नेपाल परियोजना अन्तर्गत काठमाडौं ब्लुज राउन्ड टेबल १९ ले सहयोग प्रदान गरेको हो ।
भवनको उद्घाटन गण्डकी प्रदेशका भौतिक पूर्वाधार विकास मन्त्री रामशरण बस्नेत र राउन्ड टेबल नेपालका अध्यक्ष जयन्त अग्रवालले गरेका हुन् । हस्तान्तरण कार्यक्रममा काठमाडौं ब्लुज राउन्ड टेबल १९ का सभापति शिरिश मुरारका, विद्यालयमा अध्ययनरत ८ सय जना विद्यार्थी एवं अभिभावकको उपस्थिति रहेको थियो ।
त्यसैगरी, विनाशकारी भूकम्पले पानी ट्यांकीमा नोक्सानी पु¥याएकाले कार्यक्रममा पानी संकलनका लागि विद्यालयलाई १ हजार लिटरको एउटा पानी ट्यांकी पनि हस्तान्तरण गरिएको थियो । यस साथै विद्यालयका प्रतिनिधिलाई पुस्तकालयका लागि पुस्तकहरु पनि हस्तान्तरण गरियो । अल फर नेपाल परियोजनाले राउन्ड टेबल अन्तर्गत हालसम्म देशभर ११५ वटा कक्षाकोठा हस्तान्तरण गरिसकेको छ ।