काठमाडौं । नेपालका लागि नवनियुक्त जापानी राजदुतले नेपालको विकास एवं समृद्धिको लागि नेपाली उद्योगी र जापानी उद्योगीबीचको सम्बन्धलाई प्रवद्र्धन गर्न आफू तयार रहेको बताएका छन् ।
नेपालका लागि जापानका नवनियुक्त राजदूत मासामिची साइगोले नेपाली उद्योगीहरुसँगको भेटमा सम्बन्ध प्रवद्र्धनका लागि सहजकर्ताको भूमिका निर्वाह गर्न आफू प्रयासरत हुने बताएका हुन् ।
भेटमा राजदूत साइगोले नेपालको विकास कार्यक्रममा जापानले सहयोग गर्न पाएकोमा खुसी व्यक्त गर्दै समृद्धिको मार्गमा अघि बढेको नेपालको वर्तमान अवस्थामा जापानबाट थप सहयोग र सहकार्य उपलब्ध हुने बताए । साथै जापानी लगानी नेपालमा भित्र्याउन दूतावासको तर्फबाट सक्दो पहल गर्ने दावी उनको छ ।
भेटमा परिसंघका अध्यक्ष हरिभक्त शर्माले नेपालमा विकासका आधारका साथै लगानीको उचित वातावरण श्रृजना भएको बताए । तसर्थ, जापानी उद्योगीको लागि समेत नेपाल लगानीको राम्रो क्षेत्र हुने आफूले विश्वास लिएको बताए । नेपाल उद्योग परिसंघ नेपालको निजी क्षेत्रको तर्फबाट यस कार्यमा दूतावाससँग सहकार्य गर्न तयार रहेको पनि उनले बताए ।
भेटमा शर्माले नेपालमा सञ्चालित बहुराष्ट्रिय कम्पनीले आफ्नो लगानीको राम्रो प्रतिफल प्राप्त गरेको, नेपालमा सञ्चालित उद्योगले आफ्नो लगानीको नाफा रकम फिर्ता लग्ने विषयमा कुनै समस्या नभएको समेत जानकारी दिए ।