काठमाडौं । कविताका क्षेत्रमा कलम चलाउँदै आएका कविहरुका राम्रा सिर्जना साहित्यका विशिष्ट पाठकहरूमाझ वाचन गर्ने उद्देश्यका साथ प्रारम्भ ‘हामी’ कवि र कविता, को ६० औं श्रृंखला शुक्रबार सम्पन्न भएको छ ।
हरेक महिनाको पहिलो दिन प्रस्तुत गरिँदै आइएको हामी कविता श्रृँखलामा यस पटक दुई युवा कविहरुका ओजपूर्ण कविता प्रस्तुत भए । यस पटक कवि देवान किराती र राजु स्याङतानका कविता हामीमा प्रस्तुत गरिएका थिए । यस पटकका दुई कविलाई सर्वनामका तर्फबाट अशेष मल्ल र साहित्यकला मन्दिरका विष्णुविभु घिमिरेले कार्यक्रममा स्वागत गरेका थिए ।
लूनकरणदास–गङ्गादेवी चौधरी साहित्यकला मन्दिर र सर्वनामको संयुक्त आयोजनामा निरन्तर हुँदै आएको हामी कविता श्रृँखलामा यस पटक देवान किरातीले कविता वाचन क्रमको थालनी गरे । उनले आफ्नो आठ वटा कविता वाचन गरेका थिए । उनले गाँठेकुरा, फाटेको जून, विज्ञापन, रोटी, अन्तिम साँझ, मृत्युको बिलाप, षडयन्त्र शीर्षकका कविता वाचन गरे ।
कार्यक्रमको दोस्रो चरणमा राजु स्याङ्तानज्यूले १२ वटा कविता वाचन गरे । उनले गुमनाम ताराहरू, नागरिकता, एउटा दासको घोषणापत्र, दिनचर्या, रेमिट्यान्स, त्यस दिन, च्याङ्बाको रहर, अस्तित्वलगायतका कविता वाचन गरे ।