काठमाडौं । नेपाल कम्युनिष्ट पार्टी (ने क पा) का प्रवक्ता नारायणकाजी श्रेष्ठले राजीनामा दिएको आज २८ दिन भयो । अहिलेसम्म न त पार्टीले उनको राजीनामा स्वीकृत गरेको छ न त अस्वीकृत नै ।
गत साउन ६ गते त्रिवि शिक्षण अस्पताल महाराजगन्जमा अनशनरत डा. गोविन्द केसीलाई भेटेको भन्दै पार्टी अध्यक्षसमेत रहेका प्रधानमन्त्री केपी शर्मा ओलीले स्पष्टिकरण मागेपछि श्रेष्ठले ‘तपाईँहरुको प्रवक्ता तपाईं नै खानुहोस्’ भनेर ७ गते राजीनामा दिएका थिए ।
राजीनामा फिर्ता नलिए पनि श्रेष्ठले ने क पाको प्रवक्ता पदको जिम्मेवारी भने सम्हाल्दै आएका छन् । पार्टी बैठकपछिको निर्णय पनि उनले नै सुनाउँछन् । श्रेष्ठ अहिले राजीनामा फिर्ता नलिने र पार्टीको जिम्मेवारी सम्हाल्ने पक्षमा छन् ।
“पहिलाको मनस्थितिमा मैले जसरी राजीनामा दिएको हो, अहिले पनि त्यही अवस्था छ,” श्रेष्ठले बाह्रखरीसँग संक्षिप्त कुराकानी गर्दै भने, “ राजीनामा फिर्ता लिएको छैन ।”
अब के हुन्छ ?
उनले आफू पार्टीको इमान्दार सिपाही भएको भन्दै सम्पूर्ण निर्णयहरु मान्ने बताए ।
“राजीनामाको विषयमा पार्टी कमिटीले नै निर्णय गर्छ,“ श्रेष्ठले थपे, “यसभन्दा अगाडिको बैठकमा साथीहरुले फिर्ता लिनुहोस् भन्दा मैले लिन्नँ भनेँ । म पार्टीको इमान्दार सिपाही भएसम्म सबै निर्णयहरु मान्छु । तर, पार्टीले राजीनामाको विषयमा निर्णय नै गरेको छैन । मैले फिर्ता पनि लिएको छैन र लिन्न पनि ।”
उनका अनुसार श्रेष्ठलाई स्पष्टिकरण माग्ने कुराको बारेमा अहिले अध्यक्षद्वयले गल्ती महसुस गरेका छन् । श्रष्ठले आफू राजीनामाको विषय टुंग्याउने अवस्थामा पुगेको जानकारी पनि दिए । “अब जे भएपनि पार्टी कमिटीले नै टुंग्याउनुपर्छ, टुंग्याउने अवस्थामा म पुग्छु । मेरो कुरा त मैले भनिसकेँ, म फिर्ता लिन्न,” उनले भने ।
फाइल तस्बिर