काठमाडौं । अगस्ट २० देखि सेप्टेम्बर ६ सम्म नेपाली क्रिकेट टिमका खेलाडी तथा प्राविधिक टोलीको निकै व्यस्त तालिका छ । यो व्यस्तता एसीसी एसिया कप छनोट खेलका लागि हो । 

अगस्ट २९ तारिखदेखि मलेसियामा छनोट खेल हुँदैछ र श्रीलंकामा अभ्यास खेल खेल्न नेपाली टोली आज (सोमबार) त्यसतर्फ प्रस्थान गरेको छ । यसअघि नेपाली क्रिकेट टिम विगत एक सातादेखि टियू क्रिकेट मैदानमा बन्द प्रशिक्षणमा थियो । श्रीलंका गएको नेपाली टोलीले त्यहाँका स्थानीय तीनवटा क्लबसँग अभ्यास खेल खेल्नेछ ।

श्रीलंकामा अभ्यासका लागि तीन खेलका लागि अगस्ट २२ देखि अगस्ट २६ तारिखसम्मको सेड्युल छुट्याइएको छ । श्रीलंकामा त्यहाँका माथिलो स्तरका क्लबसँग नेपालले प्रतिस्पर्धा गर्नेछ ।

केही समय अगाडिमात्रै नेपालले नेदरल्यान्ड्ससँग ऐतिहासिक एक दिवसीय अन्तर्राष्ट्रिय सिरिज खेलेर फर्किएको छ । नेदरल्यान्ड्समा भएको उक्त प्रतियोगितामा नेपाल पहिलो खेलमा ५५ रनले घरेलु टोलीसँग पराजित भएको थियो भने दोस्रो खेलमा नेपाल १ रनले विजयी हुँदै सिरिज एक—एकको बराबरीमा रोकिएको थियो ।

नेदरल्यान्ड्स टुरबाट फर्किएलगत्तै नेपाली क्रिकेट टिम एसिया कप छनोटको तयारीमा जुटेको थियो । यसैबीच नेपालले भारतबाट ब्याटिङ प्रशिक्षक ल्याएको छ ।
विगत २ वर्षदेखि नेपाल क्रिकेट संघ (क्यान) विवादमा आएपछि आईसीसीले निलम्बन गरेको  गरेको छ । यसका बाबजुद पनि नेपाली क्रिकेट टिमले एकपछि अर्को सफलता चुम्दै गएको छ । नेपाली क्रिकेटको सफलतालाई हेर्दा यो वर्ष अर्थात् सन् २०१८ लाई भाग्यशाली वर्ष मान्न सकिन्छ । 

वर्षको सुरुवातमै नेपालले नामिबियामा भएको डिभिजन टु को खेलमा उपविजेता बन्दै विश्वकप छनोट खेल खेल्ने अवसर पाएको थियो । विश्वकपमा छनोट हुन नसके पनि जिम्बाबेबाट नेपालले ४ वर्षका लागि एक दिवसीय अन्तर्राष्ट्रिय क्रिकेटको मान्यता पायो ।
सोमबार श्रीलंका जानुअघि कप्तान पारस खड्काले सबै घटनालाई सम्झँदै एसिया कप छनोटलाई सुनौलो अवसरका रुपमा मात्रै लिएनन्, त्यसलाई सक्दो सदुपयोग गर्ने वाचा पनि गरे । 

कप्तान खड्काले अवसर सधैं नआउने र पाएको मौकालाई सदुपयोग गर्ने बताए । नेपालले एसिया कप छनोटमा भिड्न लागेका टिम यसअघिकै परिचित टिम भएको भन्दै उनीहरुसँग रणनीतिक रुपमा खेल्नुपर्नेमा उनले जोड दिए । 

खड्काले भने, “हामीले राम्रोसँग उनीहरुका खेलाडीलाई चिनेका छौं भने उनीहरुले पनि हामीलाई चिनेका छन् । हामीले ट्याक्टिकल मुभले उनीहरुका खेलाडीलाई काउन्टर गर्छौं । खेलमा चुनौती छ तर, टिम यसका लागि तयार छ । हामीले प्रतियोगितामा राम्रो गरेर देखाउनेछौं ।”

छनोट खेलमा कुनै पनि टिमलाई कमजोर ठान्न नहुने उनले बताए । पारसले भने, “एसियामा भएका टिम प्रायः सबै ठिकै छन् । वर्ल्ड क्रिकेट लिग आफ्नो ठाउँमा छ । टिमको वरियता आफ्नो ठाउँमा छ । सबै टिममा राम्रो खेलाडी छन् ।”

नेपालका लागि एसिया कप छनोट खेलमा ओडीआई मान्यता प्राप्त राष्ट्र भएका कारणले एक किसिमको प्रेसरमा रहेको कप्तान खड्काले बताएका छन् । “खेलाडीहरु दिलोज्यानले लागेका छन् । विगत २—३ महिनादेखि लगातार अभ्यास खेलमै छौं । पहिलो एक दिवसीय अन्तर्राष्ट्रिय खेल खेल्यौं, अहिले एसिया कपको लागि अवसर पाएका छौं । आशा गरौं, अवसरको सदुपयोग गर्न सक्छौं,” उनले भने । वरियतामा एसिया कप छनोट खेल्ने अन्य राष्ट्रभन्दा युएई र नेपाल माथि छन् । त्यसको मतलब अरु सबै कमजोर भन्ने नभएको खड्काले बताए ।

नेपालमा सधैंजसो ब्याटिङलाई समस्या मान्दै आएको अवस्थामा कप्तान खड्का भने अब कुनै एक पक्ष ब्याटिङ या बलिङमात्रै राम्रो भएर खेल अगाडि बढाउन नसकिने बताउँछन् । उनले भने, “बलिङ, ब्याटिङ र अलराउन्डर सबै पक्ष समान रुपमा अगाडि बढाउनु पर्नेछ । अब एक पक्ष राम्रो भएर अगाडि बढ्न सकिँदैन ।”

एसिया कपमा छनोट हुने टिमले विश्व क्रिकेटका पावरहाउस मानिने भारत र पाकिस्तानसँग खेल्नेछन् । यो अवसर नेपालले पाउनेमा नेपाली क्रिकेट प्रशिक्षक जगत टमाटा विश्वस्त छन् । खेलाडी पनि आफ्नो भारत र पाकिस्तानसँग खेल्ने लक्ष्य पूरा हुनेमा आशावादी छन् ।