बीबीसी । मलेसियामा अहिले हराइरहेको खतरनाक रेडियोएक्टिभ डिभाइसको खोजी भइरहेको छ । सम्बन्धित निकायका अनुसार उक्त रेडियोएक्टिभ डिभाइस गलत तरिकाले निस्क्रिय गरिए त्यसबाट हानिकारक पदार्थ बाहिर निस्किन सक्नेछ । यति मात्र नभएर गलत हातमा परे सो डिभाइस खतरनाक हतियारमा समेत परिणत गराइन सक्ने बताइएको हो ।
तर उपकरण हराएपनि सर्वसाधारणलाई चिन्ता नलिन आग्रह गर्दै उप–गृहमन्त्री अजिस जमनले सबै नियन्त्रणमै रहेको दाबी गरिरहेका छन् । हराएको सो वस्तु औद्योगिक रेडियोग्राफीमा प्रयोग हुने गरेको बताइएको छ । त्यसले तेल, ग्यास र अन्य ठूला उद्योगहरुमा निरीक्षण गर्ने गरेको छ ।
२३ केजीको त्यो ठूलो मेटल ट्युबमा ह्यान्डल पनि रहेको र त्यसले धातुहरुमा चर्किएको ठाउँ पत्ता लगाउने गरेको बताइएको छ । तरपनि त्यसमा ‘रेडियोएक्टिभ आइसोटप इरिडियम–१९२’ रहेको हुँदा यसले विकिरणहरु फैलाउन सक्ने र विस्फोटक पदार्थसँग मिलाएर खतरनाक हतियारमा समेत परिणत हुन सक्ने भएकाले यसबारे चिन्ता व्यक्त गरिएको छ ।
अन्तर्राष्ट्रिय आणविक ऊर्जा आयोगका अनुसार भने इरिडियम–१९२ ले केही मिनेटदेखि केही घण्टामै स्थायी रुपमा चोट पुर्याउन सक्छ र थोरै दिनसम्मका लागि नजिक राखे मात्र पनि जोखिमयुक्त साबित हुने गरेको छ । पुलिस र स्थानीय मिडियाले सो उपकरण एउटा ट्रकबाट क्वालालम्पुर ल्याउँदै गर्दा हराएको जानकारी दिएका हुन् । यसमा संलग्न दुई ट्रक चालकहरुसँग अहिले पुलिसले सोधपुछ गरिरहेको छ ।
यसको चोरी भएको वा कतै खसेको हुन सक्ने अनुमान गरिएको छ । त्यसैकारण अहिले पुलिसले कुनै थप जानकारी बिना नै यसको खोजी र यसबारे अनुसन्धान गरिरहेको बताएको छ ।
https://www.bbc.com/news/world-asia-45255181