एजेन्सी । केही समय अगाडि मात्र लन्च भएका नयाँ आइफोनले सामसुङको यसअघिका सबै नाफाको रेकर्ड तोड्न मद्दत गरेको छ । यी दुवै स्मार्टफोन निर्माणकर्ता कम्पनीहरुबीच लामो समयदेखि बलियो प्रतिस्पर्धा रहँदै आएको छ । तर यसका बावजुद दक्षिण कोरियाली विद्यूतीय कम्पनी, सामसुङले एप्पललाई महत्वपूर्ण पूर्जाहरु बेच्ने गरेको सीएनएनले जनाएको छ ।
सामसुङले शुक्रबार मात्र यसबारे खबर गर्दै तीन महिनामा १५.६ अर्बको नाफा भएको जानकारी दिएको हो । यसलाई सामसुङको अहिलेसम्मकै बढी आम्दानी बताइएको छ जुन पछिल्लो समय २० प्रतिशतले वृद्धि भएको हो ।
वास्तवमा सामसुङको मेमोरी चिप र डिस्प्लेको बलियो व्यापारकै कारण यत्तिको नाफा भएको बताइएको छ । यसमा सामसुङले नयाँ रेन्जका आइफोनका लागि प्रदान गरेको फ्लेक्जिबल स्क्रिनले सबैभन्दा बढी फाइदा पुर्याएको हो । तरपनि यसले सामसुङको नाफालाई कहिलेसम्म उचाइमा राखिरहन्छ भन्नेमा चाहिँ शंका व्यक्त गरिएको छ । किनकि यसअघि सामसुङले नोट–९ रिलिज गरेपनि त्यसको व्यापार निराशाजनक रहेको बताइएको थियो । त्यसैगरी सामसुङको मेमोरी चिपको मूल्य घटाउनु पर्न सक्नेमा पनि चिन्ता व्यक्त गरिएको छ ।
पछिल्लो समय विश्वको ध्यान दक्षिण कोरियातर्फ केन्द्रित भएका कारण पनि यस विश्वकै ठूलो स्मार्टफोन निर्माणकर्तालाई व्यापारमा अधिक फाइदा पुगेको बताइएको छ । त्यसैगरी गर्मी मौसमले पनि सामसुङ इलेक्ट्रोनिक कम्पनीलाई विशेष लाभ पुर्याएको बताइएको हो ।