काठमाडौं । सशत्र प्रहरी बल (एपिएफ)का प्रशिक्षक राजेन्द्र तामाङले अग्रपंक्तिका खेलाडीमा अनुभवको कमी हुँदा सहिद स्मार ‘ए’ डिभिजन लिगको पहिलो खेलमा गोलरहित बराबरी खेल्नुपरेको बताएका छन् । सातदोबाटोस्थित एन्फा मुख्यालयको मैदानमा शुक्रबार पहिलो खेलमा एपिएफ र हिमालयन शेर्पा क्बलले गोलरहित बराबरी खेलेका हुन् ।
“हामीले पहिलो हाफमा राम्रो खेलेका थियौं । तर दोस्रो हाफमा त्यही प्रदर्शन दोहोर्याउन सकेनौं,” दुई महिनाअघि एपिएफको प्रशिक्षण सम्हालेका प्रशिक्षक तामाङले भने, “दोस्रो हाफमा हाम्रो मिडफिल्ड र फरवाडबीचको तालमेल मिलेन । फरवाडमा अनुभवको कमी हुँदा पाएको थुप्रै अवसर गुमाउनुपर्यो ।”
शीर्ष तीन टोलीभित्र पर्ने लक्ष्य लिएको एपिएफले सुरुबाटै खेल नियन्त्रणमा राखे पनि पाएको अवसरलाई सदुपयोग गर्ने सकेन । ११औं मिनेटमा एपिएफका युवराज खड्काले हानेको प्रहार हिमालयनका गोलकिपर किशोर गिरीले सजिलै बचाए । २८औं मिनेटमा रुपबहादुर लामाको फ्रिकिक पनि विपक्षी गोलकपिर किशोरले मुश्किलले बचाएका थिए । लगत्तै युवराजले गरेको प्रहारले पनि पोष्टको दिशा लिन सकेन । ४३औं मिनेटमा विश्वास श्रेष्ठको प्रहार थोरैले क्रसबार माथिबाट बाहिरिएपछि हिमालयन शेर्पाले अग्रता लिने मौका गुमाएको थियो । ६७औं मिनेटमा अमर डंगोल ‘वान भर्सेस वान’मा गोल गर्न चुक्दा हिमालयन शेर्पाले अग्रता लिने राम्रो मौका खेर फाल्यो । त्यसअघि एपिएफका सन्तोष श्रेष्ठले हानेको प्रयासमा पनि हिमालयनका गोलकिपर किशोर बाधक बने ।
हिमालयन शेर्पाका प्रशिक्षक सुवास लिम्बुले नतिजा आफ्नो पक्षमा नआए पनि खेलाडीको प्रदर्शनमा सन्तुष्टि जनाए । प्रशिक्षक लिम्बुले थपे, “हामीले सानो मैदानमा अभ्यास गरेका थियौं । यहाँ ठूलो मैदानमा खेल्दा समस्या भयो । फरवाडमा कर्ण लिम्बुमात्र अनुभवी खेलाडी भए । नतिजा सोचेजस्तो आएन तर टोलीको प्रदर्शनबाट सन्तुष्ट छु ।”