काठमाडौं । शनिबार राति निधन भएका नेपाली कांग्रेसका नेता तथा पूर्वमन्त्री चक्रप्रसाद बास्तोलाको पार्थिव शरीरमा पार्टी सभापति शेरबहादुर देउवा, कांग्रेसका अन्य नेता तथा कार्यकर्ता एवं अन्य पार्टीका नेताहरुले श्रद्धाञ्जली व्यक्त गरेका छन् । अन्तिम श्रद्धाञ्जलीका लागि बास्तोलाको शव कांग्रेस केन्द्रीय कार्यालय सानेपामा राखिएको थियो । 

उनको आजै पशुपति आर्यघाटमा अन्तिम संस्कार गरिने कार्यक्रम छ । ६ वर्षदेखि अर्धचेत अवस्थामा रहेका कांग्रेस नेता बास्तोलाको शनिबार राति ललितपुरको  खुमलटारस्थित निवासमा निधन भएको थियो । विसं २०६९ सालको पुसमा विराटनगरमा एउटा कार्यक्रममा सहभागी भइरहेकै समयमा उनलाई मस्तिष्कघात भएको थियो । त्यसयता उनको होस आएको थिएन ।