काठमाडौं । असोज मसान्तसम्म मुलुकभरिका ७७ जिल्लाका जिल्ला जनस्वास्थ्य÷स्वास्थ्य कार्यालय यथावत् रहने या प्रदेशमा गाभ्ने विषयमा सरकारले मङ्गलबारसम्म कुनै निर्णय नगरेकामा नेपाल जनस्वास्थ्य सङ्घले यथाशीघ्र निर्णयका लागि सरकारको ध्यानाकर्षण गराएको छ ।
गत वैशाख र असार महीनामा गरी दुई पटक स्वास्थ्य तथा जनसङ्ख्या मन्त्रालयले तीन तीन महीनाको म्याद थप्दै हाल जिल्ला स्वास्थ्य कार्यालय र जिल्ला जनस्वास्थ्य कार्यालय यथावत् रहने गरी निर्णय गरेको थियो । गत असारमा तीन महीनाका लागि थपिएको म्याद बुधबार सकिने भएकाले त्यसपछि के हुन्छ भन्ने विषयमा अन्योल छाएको छ ।
नेपाल जनस्वास्थ्य सङ्घका नवनिर्वाचित अध्यक्ष श्रीकृष्ण भट्टद्वारा जारी गरिएको विज्ञप्तिमा मङ्गलबार या बुधबारसम्म सो विषयमा तत्काल निर्णय गरी यसबारे देखिएको अन्योलको अन्त्य गर्न सरकारसँग आग्रह गरिएको छ ।
सङ्घका नवनिर्वाचित महासचिव धादिङ जिल्लाका वरिष्ठ जनस्वास्थ्य प्रशासक महेश्वर श्रेष्ठले कुनै पनि हालतमा सरकारले बुधबारसम्म यसबारे निर्णय नगरेमा सबै जिल्लाका जिल्ला स्वास्थ्य÷जनस्वास्थ्य कार्यालय, मेडिकल स्टोर, क्षेत्रीय प्रयोगशाला र तालीम केन्द्रका काम ठप्प हुने बताएका छन् । रासस