काठमाडौं । यूएईको आवुधावीमा जारी अष्ट्रेलियाविरुद्धको दोस्रो टेस्ट क्रिकेटमा पाकिस्तानले बलियो पकड बनाएको छ । तेस्रो दिनसम्म दोस्रो इनिङ्स व्याटिङ गरेको पाकिस्तानले अष्ट्रेलियासामु जितका लागि ५३८ रनको लक्ष्य प्रस्तुत गरेको छ । 

पहिलो इनिङ्समा अष्ट्रेलियालाई १४५ रनमै अलआउट गरेको पाकिस्तानले १३७ रनको अग्रता पाएको थियो । पाकिस्तानले पहिलो इनिङ्समा २८२ रन बनाएको थियो ।

दोस्रो इनिङ्समा ९ विकेटको क्षतिमा ४०० रन बनाएर पाकिस्तानले इनिङ्स समाप्तिको घोषणा गरेको थियो । ५३८ रनको लक्ष्य पछ्याइरहेको अष्ट्रेलियाले तेस्रो दिनको समाप्तीमा (बिहीबार) एक विकेटको क्षतिमा ४७ रन बनाएको छ । 

अष्ट्रेलियाले शुक्रबार (आज) फेरि व्याटिङ थाल्नेछ । अझै दुई दिनको खेल बाँकी भएकाले नतिजाको पूर्वानुमान गर्न नसके पनि अष्ट्रेलियाका व्याट्सम्यान राम्रो लयमा देखिएका छैनन् । पहिलो टेष्ट खेल भने अष्ट्रेलियाले निकै संघर्षपूर्ण तरिकाले बराबरीमा रोकेको थियो ।