काठमाडौं । पूर्व पश्चिम राजमार्गअन्तर्गत नवलपरासी पूर्वको मध्यविन्दु नगरपालिका–११ अरुणखोलामा आइतबार बिहान बस दुर्घटना हुँदा ६ जनाको मृत्यु भएको छ । मृत्यु हुने मध्ये १ जनाको सनाखत भएको र अन्य ५ जनाको सनाखत हुन नसकेको जिल्ला प्रहरी कार्यालय नवलपरासी पूर्वका डीएसपी लीलाधर लामिछानेले जानकारी दिए ।
उनका अनुसार ५ जनाको घटनास्थलमै मृत्यु भएको थियो भने १ जनाको चितवनको पुरानो मेडिकल अस्पतालमा उपचारका क्रममा निधन भएको हो । मृत्यु हुने गुल्मी हस्तकोटका तिलक बिष्ट रहेका छन् । उनी नेपाली सेनामा कार्यरत थिए । दुर्घटनामा ५० जना घाइते भएका लामिछानेले जनाए ।
इटहरीबाट भैरहवाका लागि छुटेको लु१ख ८४५४ नम्बरको बस आइतबार बिहान अनियन्त्रित भई सडकबाट करिब ३५ मिटर तल खसेको थियो ।