काठमाडौ । युरोपेली संघ (ईयु)बाट बेलायत छुट्टिने निर्णय (बे्रक्जिट)को विरोधमा पुनः जनमत संहग्रको माग गर्दै लाखौं बेलायती नागरिकले शनिबार लण्डनमा प्रदर्शन गरेका छन् । बीबीसीको रिपोर्टमा जनाइए अनुसार यसरी प्रदर्शन गर्नेको संख्या करिब ७ लाख रहेको थियो । तर, नगर प्रहरीले भीड भएका कारण प्रदर्शनकारीको संख्या आकलन गर्न सकिने अवस्था नरहेको जनाएको छ । 
प्रदर्शनकारीहरुले अर्को नयाँ मतदान आवश्यक भएको जनाएका थिए । यसअघि भएको जनमत संग्रहपछि अहिले नयाँ जटिलताहरु आएको उनीहरुले बताएका छन् । बेलायत इयुबाट बाहिरिने निर्णय मतदानमार्फत् नै  सन् २०१६ को जुनमा भएको थियो ।  
मतदानका क्रममा ५१ दशमलव ८९ प्रतिशतले ब्रेक्जिटका पक्षमा मतदान गरेका थिए भने ४८ दशमलब ११ प्रतिशतले इयु अन्तर्गत नै रहनुपर्ने जनाएका थिए । शनिबारको प्रदर्शनमा प्रदर्शनकारीहरु चढेका करिब १५० बस लण्डनमा राखिएका  थिए ।  सो प्रदर्शनमा लण्डनका मेयर सादिक खानसमेत सहभागी थिए । उनले साढे दुई वर्षअघि गरिएका प्रतिवद्धता पूरा गर्न लाखौं माइलको दूरी रहेको बताए । लण्डनका मेयर विपक्षी  लेबर पार्टीका हुन् । 

सन् २०१६को मतदानमा सहभागी हुन नपाएका युवाको संख्या शनिबारको प्रदर्शनमा अधिक रहेको बताइएको छ । त्यतिबेला झिनो बहुमतका साथ बेलायत इयुबाट बाहिरिने पक्षमा मत परेको थियो । शनिबारको प्रदर्शनमा थुप्रै सांसदको पनि सहभागिता रहेको थियो । उनीहरुले ताजा निर्वाचनको माग गरेका थिए । यद्यपि सत्तापक्षले भने यो विषयलाई लिएर अर्को निर्वाचन गराउन चाहेको छैन ।  मार्च २९, २०१९बाट बेलायत इयुबाट बाहिरिने तिथी तय भएपनि आयरल्याण्डसँगको विषयले अल्झिदै आएको छ । आयरल्याण्ड इयुको भूभाग अन्तर्गत पर्दछ भने उत्तरी आयरल्याण्ड बेलायतको भूभाग हो ।