काठमाडौं । घटस्थापनाका दिनबाट प्रदर्शनमा आएको चलचित्र ‘छक्का पञ्जा–३’ ले अहिले पनि उल्लेखनीय दर्शक बटुलिरहेको छ । फूलपातीका दिन रिलिज भएको चलचित्र ‘जय भोले’ले पनि दर्शकको राम्रै साथ पाइरहेको छ । ठूलो ब्यानरका यी दुई चलचित्रले दसैंलाई लक्षित गर्दै रिलिज डेट लक गरेपछि अन्य चलचित्र दसैंमा प्रदर्शन भएनन् । 

नेपालमा अधिकांश चलचित्र लगानी उठाउन नसकेर टाट पल्टिरहेका बेला ‘छक्का पञ्जा’का सिरिजले भने हरेक वर्ष राम्रो ब्यापार गर्दै आएका छन् । यो चलचित्रका लेखक, निर्माता तथा अभिनेता दीपकराज गिरीका अनुसार ‘छक्का पञ्जा’को पहिलो सिरिजले १६ र दोस्रो सिरिजले १५ करोड ग्रस कलेक्सन गरेका थिए । 

दीपाश्री निरौलाले निर्देशन गरेको चलचित्रले उत्साह जनक ब्यापार गरिरहेका बेला हरेक वर्ष ९५ प्रतिशत नेपाली चलचित्र घाटामा गइरहेका छन् । यसलाई नेपाली चलचित्रको बजार नभएर हाट बजार भएको दीपकराज गिरीको  टिप्पणी छ । “नेपाली चलचित्रको बजार छैन, हाटबजार छ,” दीपक बाह्रखरीसँग भन्छन्, “हाटबजार हप्तामा एक दिन लाग्छ, हाटबजारलाई बजार बनाउनुपर्छ । बजारमा हरेक दिन आफूले खोजेको सबै कुरा पाइन्छ ।”

हलमा प्रदर्शन हुने प्रत्येक चलचित्र कम्तिमा एभरेज मात्रै बनाउन सकेपनि नेपाली चलचित्रको बजार राम्रो हुने उनी बताउँछन् । वर्षमा मुस्किलले एकदुईटा चलचित्रमात्रै राम्रा बन्ने गरेका  कारण नेपाली चलचित्रको बजार राम्रो हुन नसकेको उनको ठम्याई छ । 

नेपाली चलचित्रको बजार उच्च नहुनुका पछाडि कमजोर पब्लिसिटी, मेकिङमा बजेटको अभाव र कमजोर कथा नै कुख्य कारण रहेको अभिनेता तथा लेखक खगेन्द्र लामिछाने बताउँछन् । 

“चलचित्रको मेरुदण्ड नै कमजोर भएपछि बाँकी अङ्गले काम गर्दैनन् । चलचित्रको मेरुदण्ड भनेको स्क्रिप्ट हो, यसमा नै हामी मेहनेत गरिरहेका छैनौं,” खगेन्द्र बाह्रखरीसँग भन्छन्, “अर्को कुरा चलचित्र बनाएर मात्रै हुँदैन त्यसको पब्लिसिटी पनि हुनुपर्छ । हाम्रा अधिकांश चलचित्र कहिले रिलिज भए र कहिले हलबाट उत्रिए भन्ने कुराको जानकारी पनि दर्शकलाई दिन सकिएको छैन । मेरा हरेक कुराको जानकारी राख्न खोज्ने केही फ्यानलाई मेरो चलचित्र ‘डण्डिबियो’ प्रर्दशन भएको थाहा थिएन । जानकारी राख्न खोज्ने दर्शकसामु पनि हामी पुग्न सकेका छैनौैं भने हाम्रा चलचित्रको मार्केटिङ कति कमजोर छ भन्ने कुराको पुष्टि यसैले गर्छ ।”

खगेन्द्र नेपाली चलचित्रको सानो आकारको बजेट पनि बजार खुम्च्याउने अर्को कारण रहेको बताउँछन् । नेपाली चलचित्रको बजेट २ करोड रुपैयाँ रहेको भन्दै उनी उक्त लगानी उठछ् कि उठ्दैन भन्ने तनावमा मेकर हुने गरेको सुनाउँछन् । यसका लागि नेपाली चलचित्रले आफूलाई फेष्टिबलमा अप्रोच गर्दै विदेशी बजार खोज्नुपर्ने उपाय सुझाउँछन् । 

नेपालमा वार्षिक १सय भन्दा धेरै चलचित्र रिलिज हुँदै आएका छन् । सयवटा चलचित्र रिलिज हुँदा  करिब ९५ वटा चलचित्र घाटामा जाने गरेका छन् ।