काठमाडौँ । नेपाल कम्युनिस्ट पार्टीको ९ सदस्यीय सचिवालयमा माधव नेपाल एक्लिएका छन् । पार्टी सचिवालयको बैठकले तेस्रो वरियताका नेता माधव नेपालले २२ असोजमा पेश गरेको लिखित असहमतिमाथि कुनै निर्णय गरेन ।

“माधव नेपालले पेस गर्नुभएको प्रस्तावमाथि लामो छलफल भयो । तर, त्यसविषयमा कुनै निर्णय भएन,”सोमबारको सचिवालयको बैठकपछि चौथो वरियताका नेता झलनाथ खनालले बाह्रखरीसँग भने ।

खनालका अनुसार बैठकमा ५ असोजको सचिवालयको बैठकले गरेको निर्णयसँग सम्बन्धित रहेर नेता नेपालले असहमति पेस गरेका थिए । 

नेता नेपालले लिखितरूपमा बुझाएको पत्रमा पार्टीका हरेक निर्णय सहमतिका आधारमा गरिनुपर्ने, पार्टीले यसअघि तय गरेको मापदण्डमै टेकेर एकव्यक्ति एक पद, जिम्मेवारी बाँडफाँट गरिनुपर्नेलगायतका विषय समाविष्ट थिए ।

नेता नेपालले आफू विदेश भएकाबेला २८ भदौमा बसेको सचिवालयको बैठकको मर्म, भावना लत्याएर प्रदेश इन्चार्ज, सहइन्चार्ज, अध्यक्ष र सचिव तोकिएको भन्दै असन्तुष्टि व्यक्ति गर्दै आएका छन् । भदौको अन्तिम साता (२८ भदौ)मा बसेको सचिवालयको बैठकले प्रदेश, जिल्ला तहको कमिटी एकीकरण गर्न नयाँ मापदण्ड, विधि तय गर्न प्रस्ताव तयार पार्ने जिम्मा अध्यक्षद्वयलाई जिम्मेवारी दिने निर्णय गरेको थियो ।

तर, सचिवालयले निर्णय गरिसकेकाले त्यसबारेमा पुनर्विचार नगर्ने निर्णय भएको नेता खनालको भनाइ छ ।

“आगामी दिनमा निर्णय गर्दा उहाँले उठाएका कुराको सम्बोधन गर्ने तर निर्णय भइसकेकाले त्यसमा पुनर्विचार गर्ने तहमा बैठक पुगेन । त्यसमा उहाँ पनि सहमत हुनुभयो,” नेता खनालले भने ।

माधव नेपाल किन एक्लिए ?

आइतबार र सोमबारका लागि बोलाइएको बैठकमा आधादर्जन बढी एजेन्डा थिए । आइतबारको बैठक पूरै रामवीरको राजीनामा र वामदेव प्रकरणमाथिको छलफलमै सीमित भयो । आइतबारको बैठकमा जसरी वामदेव एक्लै परे, सोमबारको बैठकमा त्यही ‘नियति’ नेता नेपालको हकमा पनि दोहोरियो ।

“रामवीरलाई राजीनामा दिन लगाउने र वामदेवलाई उपनिर्वाचन लडाउने प्रस्तावमा जसरी सचिवालयका आठैजना नेता विपक्षमा देखिनुभो, नेता नेपालको हकमा पनि त्यही लागुभयो,” सचिवालयका एक नेताले भने ।

विशेषगरी नेता नेपालले वर्षे अधिवेशन अन्त्यका दिन संसद्मा गरेको सम्बोधनप्रति सचिवालयकै नेता असन्तुष्ट थिए । विधि, पद्धति र कमिटी प्रणालीको कुरा उठाउने नेता नेपालले सरकारको आलोचना सार्वजनिक मञ्चमा गरेको भन्दै पार्टीभित्रै उनको तीव्र आलोचना भएको थियो । त्यस्तै पार्टी अध्यक्षद्वय मुलुक बाहिर रहेका बेला स्थायी कमिटीको भेला बोलाएर ‘शक्तिको अभ्यास’ गरेको भन्दै सचिवालका नेता रूष्ट थिए ।

चौथो वरियताका नेता झलनाथ खनालले नेता नेपालको प्रस्तुतिको त्यतिबेलै टिप्पणी गरेका थिए । नेता नेपालले आयोजना गरेको चियाभेलामा समेत उनी अनुपस्थित रहे ।

त्यस्तै प्रवक्ता नारायणकाजी श्रेष्ठ, गृहमन्त्रीसमेत रहेका नेता रामबहादुर थापा बादललगायत पूर्वमाओवादी निकट नेताहरू पनि नेता नेपालको शैलीप्रति सन्तुष्ट थिएनन् ।

ईश्वर पोखरेल, वामदेव गौतम समेतले साथ नदिएपछि नेता नेपाल असन्तुष्टि सम्बोधन गराउन असफल भएका हुन् ।

आइतबारको बैठक ईश्वर पोखरेलको आलोचनामा केन्द्रित
आइतबारको बैठकले काठमाडौँ–७बाट प्रतिनिधिसभामा निर्वाचित सांसद रामवीर मानन्धरको राजीनामा प्रकरण विधिवत् टुंग्यायो ।

बैठकको शुरूमै एकघन्टा बोलेका वामदेवले उपनिर्वाचन लड्ने प्रयासको सक्दो बचाउ गरेका थिए । व्यक्तिगत इच्छा, चाहनाले भन्दा पनि पार्टीको आवश्यकताले उपनिर्वाचन लड्ने मनस्थितिमा पुगेको बताएको एक सचिवालयका नेताले बताए ।

“सचिवालयले दृष्टिकोण नबनाउँदै, छलफल नहुँदै समाजिक सञ्जालमा मविरुद्ध प्रचार शुरू गरियो, अनेक कोणबाट मलाई बदनाम गराउने कोशिस भयो,” गौतमको भनाइ उद्धृत गर्दै ती नेताले बाह्रखरीलाई बताए ।

त्यस्तै उनले आफूलाई भारतीयको उक्साहटमा उपनिर्वाचन लड्न लागेको भनेर प्रचार गरिएको भन्दै बैठकमै दुःखेसो पोखेको स्रोतको दाबी छ ।

उनको असन्तुष्टि विशेष गरी रक्षामन्त्री समेत रहेका नेता ईश्वर पोखरेलप्रति थियो । उनले पार्टीले कुनै धारणा बनाउन नपाउँदै, निर्णय नै नहुँदै मिडियाबाजी गरिएको भन्दै तीतो पोखेका थिए ।

ईश्वर पोखरेलप्रति आक्रोश वामदेवलेमात्रै पोखेनन् । पार्टी अध्यक्ष पुष्पकमल दाहाललेसमेत ईश्वर पोखरेलको फेसबुक स्ट्याटसलाई लिएर असन्तुष्टि जाहेर गरेको स्रोत बताउँछ ।

“म सम्बन्ध सुधार्न भारत भ्रमणमा गएको थिएँ, तर मेरो भारत भ्रमणलाईसमेत विवादमा पार्ने कोशिस भयो,” प्रचण्डको भनाइ उद्धृत गर्दै स्रोतले बतायो ।

पोखरेलले सामाजिक सञ्जालमा व्यक्त गरेको टिप्पणीप्रति नेता नेपालले पनि बैठकमा आलोचना गरेका थिए ।

यसैबीच बुधबार बस्ने बैठकले बाँकी एजेन्डामा छलफल हुने पार्टी प्रवक्ता नारायणकाजी श्रेष्ठले जानकारी दिए । त्यस्तै आज बसेको बैठकले नेता श्रेष्ठले प्रवक्ता पदबाट दिएको राजीनामा अस्वीकृत गरेको उनको भनाइ थियो ।

सात गते बस्ने बैठकले सरकारको समीक्षा, प्रदेश कमिटीको पूर्णता, जिल्ला तहको कमिटीको एकीकरण, केन्द्रीय निकाय र विभागको गठन, जनसंगठनको एकता, चियापान कार्यक्रम लगायतका विषयमा छलफल गरी निर्णय लिने प्रवक्ता श्रेष्ठको भनाइ थियो ।
फाइल तस्बिर