काठमाडौं संसदीय निर्वाचन क्षेत्र नम्बर ७ बाट प्रतिनिधि सभामा निर्वाचित सदस्य रामवीर मानन्धरको राजीनामा प्रकरण नेपाल कम्युनिस्ट पार्टी (नेकपा)का नेता वामदेव गौतमको तेजोबध गरेर सामसुम भएको छ । मानन्धरले आफ्नो राजीनामा पत्र सभामुखको साटो पार्टीका एक जना अध्यक्षलाई बुझाएकाले होला पार्टीकै बैठकले अस्वीकृत गर्ने निर्णय गरेको समाचार सार्वजनिक भएको छ । पार्टी नेता वामदेव गौतमलाई प्रतिनिधि सभाको सदस्य बनाउन सांसद मानन्धरले पदबाट राजीनामा दिने घोषणा गरेका थिए । नेता गौतम प्रतिनिधि सभा निर्वाचनमा बर्दियाबाट पराजित भएका थिए । चुनाव हारेपछि उनले सांसद बन्नका लागि अरू सांसदलाई पद त्याग गराउने प्रयास गरेकोमा विफल भएका थिए । अन्ततः मानन्धरले गौतमलाई सांसद हुने बाटो खोल्न आफ्नो पदबाट राजीनामा दिने घोषणा गरेका थिए ।
रामवीर मानन्धरको राजीनामा प्रकरणले सत्तारुढ नेपाल कम्युनिस्ट पार्टी (नेकपा)भित्र खलबल मच्चियो । त्यस्तै उनी निर्वाचित भएको क्षेत्रमा पनि हलचल ल्यायो । मानन्धरकै पार्टीका कतिपय कार्यकर्ताले उनको निर्णयको विरोध गरे । निर्वाचन क्षेत्रका जनताले मानन्धरको राजीनामा गर्ने निर्णयप्रति विश्मय प्रकट गरे । अनावश्यक उपनिर्वाचन गराउन खोजेकोमा मानन्धर, गौतम र नेकपाको व्यापक आलोचना भयो । सामाजिक सञ्जालमा पनि मानन्धरको निर्णयको व्यापक आलोचना भयो । मानन्धरहरूको एउटा संस्थाले त रामवीरलाई दिएको सम्मानसमेत फिर्ता लिने निर्णय गरेको समाचार सार्वजनिक भएको थियो । यति सबै भइसकेपछि नेता गौतमले आफू काठमाडौं – ७ बाट चुनाव नलड्ने घोषणा गरे । अन्ततः नेकपा (नेकपा) ले रामवीर मानन्धरको राजीनामा प्रकरण समाप्त भएको निर्णय गरेको समाचार सार्वजनिक भयो ।
कानुनीरूपमा रामवीर मानन्धरको पद कायमै छ । त्यसो त उनले राजीनामा नै पार्टीका अध्यक्षलाई बुझाएका थिए । पद त्याग गर्न त संसद् सचिवालयमा लिखित राजीनामा दर्ता गराउनुपर्छ । तैपनि, रामवीर मानन्धरले पद त्याग गर्ने घोषणा त गरेकै हुन् । यसैले नैतिक दृष्टिबाट उनले पदमा बसिरहनु उचित देखिँदैन । पार्टीको गुटगत स्वार्थका लागि मतदातालाई धोका दिन तम्सने प्रवृत्ति भएको व्यक्तिले प्रतिनिधित्व गर्दा काठमाडौं – ७ का जनताले पनि अपमान बोध गरेको हुनुपर्छ । कम्युनिस्टहरूका लागि सिद्धान्ततः नैतिकता ‘बुर्जुवाहरूको स्वार्थ’का लागि प्रयोग हुने शब्द होला तर संसदीय राजनीतिमा नैतिकता भएन भने विकृति झाँगिन्छ । अहिलेको शासन प्रणाली परिमार्जित भए पनि संसदीय व्यवस्था नै हो । यसैले राजनीतिलाई थप विकृत हुन नदिने हो भने रामवीर प्रवृत्तिलाई हतोत्साहित गर्नुपर्छ । बहुमत र कानुनी दाउपेचका आडमा यस्तो विकृत प्रवृत्तिलाई संरक्षण गर्दा शासन पद्धतिका साथै सत्तारुढ दलकै लागि पनि प्रत्युत्पादक हुनेछ । नैतिक दृष्टिबाट परास्त हुने कि रामवीर प्रवृत्तिलाई हतोत्साहित गर्ने नेपाल कम्युनिस्ट पार्टी (नेकपा) का संसदीय दलका नेता तथा पार्टी अध्यक्ष प्रधानमन्त्री केपी ओलीले नै रोज्नुपर्छ । नैतिकतालार्इ बेवास्ता गर्ने यही प्रवृत्ति बढ्यो भने लोकतन्त्रको त उपहास हुने नै छ राष्ट्रियता जोगाउन पनि सकिनेछैन ।