काठमाडौं । सन्दीप लामिछानेलाई अस्ट्रेलियन बिग बास क्रिकेट लिगमा अनुबन्ध गरेको मेलबर्न स्टार्सका लिस्ट म्यानेजर ट्रेन्ट उडहिलले नेपाली लेग स्पिनर प्रतियोगितामा स्टार बन्ने आशा व्यक्त गरेका छन् । मलेसियामा सम्पन्न एसियन यु—१९ च्याम्पियनसिपमा पहिलो पटक सन्दीपको खेल हेर्न पाएको बताउँदै उनले भने, “उनको बलिङ क्षमता र आक्रामकताले प्रभावित बनाएको थियो । आईपीएलमा दिल्लीबाट डेब्यु गरेका सन्दीपले सिपिएलमा पनि उत्कृष्ट प्रदर्शन गरेका थिए । विश्वास छ, उनले बिबिएलमा पनि राम्रो प्रदर्शन गरेर प्रतियोगितामा स्टार बन्नेछन् ।”
सोमबार सन्दीपलाई मेलबर्न स्टार्सले आउँदो सिजनका लागि टिममा अनुबन्ध गरेको हो । १८ वर्षे लेग स्पिनर सन्दीप मेलबर्नबाट दुई सत्रमा खेल्नेछन् ।
उनी बिग बास खेल्न डिसेम्बर १० मा अस्ट्रेलिया पुग्नेछन् । बंगलादेश प्रिमियर लिग (बीपीएल) मा यसअघि नै अनुबन्धित भइसकेकाले उनी सिलेट सिक्सर्सबाट बीपीएल खेल्न जनवरी १५ मा बंगलादेश आउनेछन् । बीपीएल सकिएपछि उनी फेरि बिग बासका लागि अस्ट्रेलिया फर्कने मेलबर्न स्टार्सको वेबसाइटमा उल्लेख छ । सन्दीप बिग बास खेल्ने एसोसिएट राष्ट्रकै पहिलो क्रिकेटर हुनेछन् ।
सन्दीपले यसअघि क्यानडामा ग्लोबल टी–२० लिग खेल्दा ४० हजार डलर पाएका थिए भने सन्दीपले बिग बासमा पाउने पारिश्रमिक अहिलेसम्मकै बढी हुुनेछ । फ्रेन्चाइज लिगमा इन्डियन प्रिमियर लिग (आईपीएल) र बिग बास सबैभन्दा ठूला प्रतियोगिता हुन् । अस्ट्रेलियाका पूर्वकप्तान माइकल क्लार्कले साढे दुई वर्षअघि सन्दीपलाई सिड्नीमा बोलाएर बेस्ट सबर्सबाट ग्रेड क्रिकेट खेल्ने मौका दिएका थिए । क्लार्कले सन्दीपको सपना पूरा भएको र यसले गौरवान्वित बनाएको बताएका छन् ।
सन्दीपले दिल्ली डेयरडेभिल्सका सहयात्री ग्लेन म्याक्सवेलसँग बिबिएलमा पनि खेल्न पाउँदा खुशी लागेको बताए । “मेलबर्नसँग अनुबन्ध हुन पाउँदा धेरै खुशी लागेको छ, मेलबर्न क्रिकेट मैदानमा खेल्ने मेरो सपना थियो । म धेरै उत्साहित छु,” सन्दीप लामिछानेले भने, “मलाई सहयोग र माया गर्ने सबैलाई धन्यवाद । म मेरो तर्फबाट सक्दो राम्रो गर्ने प्रयास गर्नेछु ।”
अफगानिस्तान प्रिमियर लिग (एपीएल) खेलेर सन्दीप २ दिन अघिमात्र नेपाल फर्किएका छन् । उनी शुक्रबारदेखि पोखरामा सुरु हुने पोखरा प्रिमियर लिगमा विराटनगर टाइटन्सका मार्की प्लेयर रुपमा खेल्नेछन् ।