गएको साता नेपाली दैनिक पत्रिकामा मूलतः दुईटा विषयले महत्त्व पाए । नेपाल कम्युनिस्ट पार्टी (नेकपा)ले कात्तिक १० गते शनिवार आयोजना गरेको चियापान कार्यक्रममा प्रधानमन्त्री केपी शर्मा ओलीको अनुपस्थितिले खडा गरेको प्रश्न र निर्मला हत्याकाण्डको अनुसन्धानमा देखिएको असफलता ।
आइतवार प्रधानमन्त्री ओली शनिवार चियापानमा नआउनु कुनै कारण थियो कि भन्ने शंका जन्मिएको थियो । तर, सोमवारदेखि प्रधानमन्त्रीलाई अस्पतालमा नै भर्ना हुनुपर्ने स्थिति आयो । भाइरल ज्वरोको कारण केही दिनदेखि औषधि सेवन गरिरहेका प्रधानमन्त्रीलाई सोमवार त्रिवि शिक्षण अस्पताल लगियो । उनको उपचार त्यहीँको मनमोहन हार्ट सेन्टरमा भयो ।
प्रधानमन्त्री अस्पताल भर्ना भएको विषयमा पहिलो दिन सबै दैनिक पत्रिकाले समाचार प्रकाशित गरेका थिए । कान्तिपुर, हिमालय टाइम्स, नयाँ पत्रिका तथा नागरिकले औपचारिक समाचारलाई मुख्य बनाए । अन्य पत्रिकाले पनि प्रथम पृष्ठमा मध्य समाचार बनाए ।
मंगलवारकै पत्रिकामा प्रधानमन्त्रीको स्वास्थ्यमा सुधार आएको समाचार तथा प्रधानमन्त्रीको सन्देश समेत प्रकाशित भयो । प्रधानमन्त्री सन्चो भएको समाचारलाई भने सबै पत्रिकाले उस्तै कभरेज दिएनन् । राजधानीले यो समाचारलाई ब्यानर न्युज नै बनायो । त्यस्तै हिमालय टाइम्सले पनि यो समाचारलाई ६ कोलमको ठूलो समाचार बनायो । यी दुईभन्दा गोरखापत्रको कभरेज बरु कम थियो । कान्तिपुर, नयाँ पत्रिका, नागरिक तथा अन्नपूर्ण पोस्टले यो समाचारलाई बिरामी भएको जत्ति ठूलो मानेनन् । बाँकी दिन प्रधानमन्त्रीको स्वास्थ्यमा सुधार आउँदै गएकोले पत्रिकाले खासै ठूलो समाचार त बनाएनन् तर प्रथम पृष्ठमा धेरैले समाचार प्रकाशित गरी नै रहे । सोमवार अस्पताल भर्ना भएका प्रधानमन्त्री शुक्रवार निवास फर्के । प्रधानमन्त्री निको भएर फर्केको समाचारलाई गोरखापत्रले मुख्य समाचार बनायो भने राजधानीले ठूलो एन्कर । अन्य पत्रिकाले खासै महत्त्व दिएनन् ।
निर्मला प्रकरणको १०० दिन
गत बिहीवार कंचनपुरकी १३ वर्षीया बालिका निर्मला पन्तको बलात्कार तथा हत्या भएको १०० दिन पुगेको छ तर सरकारले सो घटनाको दोषी पक्रन सकेको छैन । यस विषयमा पनि नेपालका दैनिक पत्रिकाले निकै सशक्त आवाज उठाएका छन् । शुक्रवारको नागरिकले सबैभन्दा ठूलो स्थान दियो । कंचनपुरबाट दिलबहादुर छन्त्यालले लेखेको समाचारमा पन्त प्रकरणम विभिन्न छानबिन समिति गठन र चौतर्फी दबाब सिर्जना भए पनि सरकारले हत्यारा पत्ता लगाउन नसकेको व्यहोरा लेखिएको थियो । छानबिनको क्रममा प्रहरीले करिब डेढसय व्यक्तिसँग सोधपुछ गरेको तर कुनै तथ्यमा पुग्न नसकेको पनि सो समाचारमा जनाइएको छ ।
सोही दिनको राजधानी दैनिकले पनि निर्मला हत्याको सय दिनमा ‘अनुसन्धान परिणाम शून्य’ भन्ने शीर्षकमा मुख्य समाचार बनाएको छ । सो समाचारमा स्वर्गीय निर्मला पन्तका बुबा यज्ञराज पन्तले आफ्नो परिवारलाई सुरक्षा खतरा भएको बताएका छन् । उनका अनुसार प्रहरीले सिभिलमा मान्छे पठाएर उनीहरूको परिवारलाई अझैपनि फकाउन प्रयास गरिरहेको छ । मिठाइ, फलुफूल लिएर विभिन्न मान्छे आउने र अब पुराना कुरा बिर्सनु भन्दै प्रभाव पार्ने कुरा पन्तले राजधानीलाई बताएका छन् । उनको विचारमा प्रहरी अझै पनि कुनै निर्दोष व्यक्तिलाई सो हत्या काण्डमा फँसाएर दोषीलाई उम्काउने दाउमा छ । स्मरणीय छ, यसअघि एकपटक निर्दोष व्यक्तिलाई अपराधी भनेर प्रहरीले सार्वजनिक गरेको थियो । तर, उनको डीएन नमिलेपछि मुक्त गरिएको थियो ।
मन्त्री स्थापित भए विस्थापित
तीन नंबर प्रदेशमा बसोबास गर्ने धेरै व्यक्तिलाई यो प्रदेशको मुख्यमन्त्रीको नाम त थाहा होला तर कुनै बेला काठमाडौंका विजयी मेयर र राजाबाट पनि नियुक्त भएका मेयर केशव स्थापित यो प्रदेशका भौतिक पूर्वाधार मन्त्री थिए भनेर थाहै थिएन होला । उनलाई पदबाट खारेज गर्ने चर्चा थालिएपछि बल्ल सबैले उनी त मन्त्री रहेछन् भन्ने थाहा पाएजस्तो भएको छ ।
प्रदेश नंबर तीनका मुख्यमन्त्री डोरमणि पौडेललाई बुधबार मन्त्रिपरिषद् बैठकमै भौतिक पूर्वाधारमन्त्री केशव स्थापितले मुख छाडेपछि विवाद उत्कर्षमा पुगेको थियो । अन्नपूर्ण पोस्टले शुक्रवारको अंकमा मुख्य बनाएको समाचारअनुसार मुख्यमन्त्रीले प्रदेशको भौतिक पूर्वाधारमा सबैभन्दा बढी बजेट गएको तर काम न्यून भएको गुनासो गरेका थिए । पोस्टलाई आन्तरिक मामिला तथा कानुन मन्त्री शालिकराम जमकट्टेलले दिएको जानकारीअनुसार बैठक सकिनै लागेको बेला मन्त्री स्थापितले आफ्नो एजेन्डा छ भन्दै आक्रोशित भएर गाली गलौज गरेका थिए ।
नयाँ पत्रिकाले पनि यो समाचारलाई सात कोलममा प्रकाशित गर्दै ‘आन्तरिक तनावमा प्रदेशका मन्त्रिपरिषद्’ शीर्षकमा समाचार प्रकाशित गरेको थियो । सो समाचारका अनुसार डोरमणि पौडेल आफ्ना मन्त्री स्थापितलाई वर्खास्त गर्न सल्लाह लिन प्रधानमन्त्री भेट्न आइपुगेका थिए । उनलाई प्रधानमन्त्रीले केही दिन पर्खन निर्देशन दिएको भन्ने नयाँ पत्रिकाको समाचार भने एक दिन पनि टिकेन । शुक्रवार नै मुख्यमन्त्री पौडेलले प्रदेशमन्त्री केशव स्थापितलाई पदबाट बर्खास्त गरिदिए ।
नागरिकले शनिबार प्रकाशित गरेको समाचारअनुसार संविधानको धारा १६९ का उपधारा २ (ख) अनुसार स्थापितलाई शुक्रवार मन्त्री पदबाट बर्खास्त गरिएको हो । ‘मुख्यमन्त्रीज्यूले संविधानअनुसार स्थापितलाई पदमुक्त गर्नुभएको हो । मुख्यमन्त्रीको निर्देशन नटेर्ने र मन्त्रालयको बजेट सबैभन्दा बढी भए पनि प्रगति शून्य भएकाले बाध्य भएर उहाँले बर्खास्त गर्नुभयको हो,’ मुख्यमन्त्रीका स्वकीय सचिव अनुप पौडेललाई उद्धृत गर्दै नागरिकले लेखेको छ । यो समाचारलाई राजधानीले पनि प्रथम पृष्ठमा स्थान दिँदै ‘प्रदेशमन्त्री स्थापित बर्खास्त’ शीर्षक दिएको छ ।
तस्बिरः प्रधानमन्त्री सचिवालय