काठमाडौं । नेपाली चलचित्र ठूलो ब्यानरका हिन्दी चलचित्रको मारमा पर्ने गरेको पुरानै तथ्य हो । बलिउड स्टारका चलचित्र रिलिज हुँदा त्यसको प्रत्यक्ष मार नेपाली चलचित्रलाई पर्छ । बलिउडमा रिलिज भएकै दिन नेपमलमा पनि रिलिज हुने हिन्दी चलचित्रले नेपाली चलचित्रको बजारमा असर गर्दै आएका छन् । 

यसको पछिल्लो उदाहरणका रुपमा चलचित्र ‘सञ्जू’लाई लिन सकिन्छ । ‘सञ्जू’ रिलिज हुने भएपछि नेपालमा कुनै पनि नेपाली चलचित्र नेपालमा रिलिज भएनन् । भलै उक्त समयमा विश्वकप फुटवल पनि चलिरहेको थियो । बलिउड स्टारका चलचित्रको रिलिज डेट हेरेर मात्रै नेपाली चलचित्रले आफ्नो रिलिज डेट लक गर्दै आएका छन् । नेपाली दुईतीन वटा चलचित्रसँग जुध्न तम्तयार हुने चलचित्र हिन्दी चलचित्रसँग भने डराउँछन् । 

यद्यपि राम्रा चलचित्र बनेको खण्डमा भने डराउनु पर्ने अवस्था नरहेको नेपाली चलचित्रले नै उदाहरण प्रस्तुत गरिसकेका छन् । यसको उदाहरणका रुपमा चलचित्र ‘छक्का पञ्जा’लाई लिन सकिन्छ । १६ करोडभन्दा माथि ब्यापार गरेको यसका निर्माताले दाबी गर्दै आएका छन् । 

यही विहीबारबाट संसारभर एकै दिन बलिउड स्टारहरुको चलचित्र ‘ठग्स अफ हिन्दोस्तान’ रिलिज भयो । ‘ठग्स अफ हिन्दोस्तान’ अमिताव बच्चन र आमिर खान जस्ता सुपर स्टार रहेको प्रतिक्षित चलचित्र हो । 

यही चलचित्र रिलिज भइरहँदा नेपालमा चलचित्र ‘चङ्गा चेट’ र ‘मालिका’ प्रदर्शनरत छन् । दीपावलीको छेको पारेर रिलिज भएका यी दुई चलचित्र अहिले पनि प्रदर्शनमा छन् । चलचित्र ‘पशुपतिप्रसाद’ फेम्ड निर्देशक दीपेन्द्र के खानल निर्देशित चलचित्र ‘चङ्गा चेट’ उत्साहप्रद रुपमा हलमा चलिरहेको छ । ‘ठग्स अफ हिन्दोस्तान’को समीक्षा राम्रो नआएपछि यसको प्रत्यक्ष असर ‘चङ्गा चेटले उठाएको छ । बिहीबार र शुक्रबार दर्शकको आकर्षण देखिए पनि शनिबारसम्म आइपुग्दा ‘ठग्स अफ हिन्दोस्तान’मा दर्शकको संख्या कम भएको छ । विस्तारै ‘ठग्स अफ हिन्दोस्तान’मा दर्शकको संख्या घटेपछि हलसंख्या र शो बाँडेको चङ्गाचेटले फेरि गुमेका हल र शो पाउने सम्भावना देखिएको छ । “गुण, गोपी, अष्टनारायण लगायतका हलमा अहिले पनि हाउसफुल छ चलचित्र,” चङ्गा चेट निर्देशक दीपेन्द्र के खानल भन्छन्, “‘ठग्स अफ हिन्दोस्तान’को रिभ्यू राम्रो नआएपछि अब मल्टिप्लेक्समा पनि दर्शक हाम्रो चलचित्रले तान्ने निश्चित छ । बिहीबार र शुक्रबार मल्टिप्लेक्समा हाम्रो चलचित्रमा दर्शकको संख्या केही घटे पनि आजबाट पुनः करिब करिब हाउसफुल छ ।” सिंगल थिएटरमा शुक्रबार ‘चङ्गा चेट’ हाउसफुल भएको उनले बताए । 

राम्रो चलचित्र बने हिन्दी चलचित्रलाई नेपाली बजारमा नेपाली मुभीले पछि पार्ने पनि निर्देशक खनाल बताउँछन् । बलिउड  सुपर स्टारका चलचित्रले केही प्रभाव पारे पनि दर्शकको चहाना र रुची बुझेर बनाउन सके नेपाली चलचित्रले हिन्दीका दर्शक खोस्न सक्ने खनाल बताउँछन् । सलमानको चलचित्र ‘ट्यूबलाइट’ पनि फल्प भएको थियो । यसको अर्थ स्टारडमले चलचित्र चल्दैनन् भन्ने हो । 

यसलाई पुष्टि गर्दै दीपकराज गिरी भन्छन्, “पक्कै पनि राम्रो कथा चाहिन्छ । फण्डाले दुई दिन काम गर्छ । एक्टरले दुई दिन चल्छ । कलरफुल चिजले दुईदिन चल्छ । अर्को दिनदेखि भगवान महादेव नै आउनुभयो भने पनि चलचित्र चल्दैन । चलचित्र नै राम्रो हुनुपर्छ । बलिउडकै चलचित्र हेर्दा सलमानका कुनै चलचित्र महिनौं चल्छन् कुनै आइतबार नै थला पर्छन् । चलचित्र राम्रो छैन भने संसारका सबै पावर ल्याएर प्रयोग गरेपनि काम छैन ।”

गोजीमा दाम हुनेको रवाफ र नहुनेहरुको संघर्षको कथा बोकेको ‘चङ्गा चेट’ सिचुवेसनल कमेडी चलचित्र हो । चलचित्रमा आयुषमान देषराज जोशी, प्रियंका कार्की, रवीन्द्र झा, सन्दिप क्षेत्री, सुरक्षा पन्त, अर्पण थापा, ऋचा शर्मा, माओत्से गुरुङ लगायतका कलाकारले अभिनय गरेका छन् ।