काठमाडौं । नेपाल भ्रमणमा रहेका दक्षिण अफ्रिकाका पूर्व अन्तर्राष्ट्रिय क्रिकेटर जोन्टी रोड्सले मंगलबार कीर्तिपुरस्थित त्रिवि क्रिकेट मैदानमा नेपाली प्रशिक्षकहरुसँग अन्र्तक्रिया गरेका छन् । जोन्टीले प्रशिक्षकहरुसँग बुधबारबाट हुने विशेष प्रशिक्षणबारे छलफल गरेका हुन् ।
नेपाल क्रिकेट स्कुल र स्पोट्स एडको संयोजनमा आयोजना गरिएको क्याम्पमा जोन्टीले बुधबारबाट दश दिनसम्म नेपाली युवा खेलाडीलाई प्रशिक्षण दिनेछन् । विश्व क्रिकेट इतिहासकै सर्वोत्कृष्ट फिल्डरमध्ये एक मानिने जोन्टीले यसबीचमा यु—१९, यु—१६ राष्ट्रिय क्रिकेट टोलीका खेलाडी र सिनीयर क्रिकेट टोलीलाई त्रिवि मैदानमा प्रशिक्षण दिने जनाइएको छ ।
नेपाल क्रिकेट स्कुलका निर्देशक अभिशेक केसीका अनुसार जोन्टीले राष्ट्रिय टोली र यु–१९ राष्ट्रिय टिमलाई ३–३ सेसन जोन्टीले प्रशिक्षण दिनेछन् । मंगलबार भएको छलफल कार्यक्रममा नेपालका प्रशिक्षकहरुमा राष्ट्रिय टोलीका प्रशिक्षक जगत टमटासहित मञ्जित आलम खान, कलाम अलि, दीपेन्द्र चौधरी, नरेश बुढाएर, सुनिल लामा र महिलामा निराराज उपाध्याय र बिना बुढामगर सहभागि भएका थिए ।
दश दिन चल्ने क्याम्पमा नेपाली प्रशिक्षकसमेत जोन्टीसँगै क्याम्पमा रहने आयोजकले बताएका छन् ।
