काठमाडौं । बुधबार नेप्से परिसूचकमा झिनो सुधार देखिएको छ । अनलाइन सेयर कारोबार प्रणाली स्थापनापछि नेप्से परिसूचकले पहिलोपल्ट लगातार दुईदिनको सुधार आत्मसात् गरेको हो ।

बुधबारको सुधारले अनलाइन कारोबार प्रणालीको सुरु भएसँगै उब्जिएका हलचल विस्तारै मत्थर हुँदै गएको संकेत गरेको लगानीकर्ताले बताएका छन् । प्रणाली सुरु हुँदै आएका प्राविधिक कठिनाइ विस्तारै हल हुँदै गएको र लगानीकर्ता पनि प्रणालीसँग अभ्यस्त हुन थालेपछि सेयर बजार बढेको जानकारको दाबी छ ।

नेप्से परिसूचक बुधबार ० दशमलव ९८ अंकले बढेको छ । दिनैभरिको आरोहअवरोहपछि बजार परिसूचक १ हजार २ सय ८ दशमलव ५६ अंकमा आएको हो । नेप्से बढ्दा यसदिन सेन्सिटिभ इन्डेक्स पनि शून्य दशमलव १७ अंकले बढेको हो । त्यसैगरी कारोबार रकममा भने सुधार आएको छ । कारोबार रकममा आएको गिरावटका बाबजुद टर्नओभरमा सुधार आएको हो ।

यसदिन बजारमा २ हजार ६ सय २८ वटा कारोबार भए । सोक्रममा १ सय ४४ कम्पनीका ७ लाख ८५ हजार ९ सय ९३ कित्ता सेयर १७ करोड ८३ लाख ८० हजार ९ सय ३७ रुपैयाँमा किनबेच भए । मंगलबार १७ करोड ४१ लाख ५५ हजार ३ सय ९० रुपैयाँको कारोबार भएको थियो ।

यसअघि नेप्से अनलाइन कारोबार प्रणालीमा देखिएको समस्या समाधान गर्न लगानीकर्ताले नेप्सेलाई आग्रह गरेका थिए । त्यसको भोलिपल्ट (मंगलबार) नै परिसूचकमा १४ अंकको सुधार देखिएको थियो ।

अझै समस्या

नेप्से परिसूचक बढेपनि नेप्सेको वेबसाइटमा समस्या देखापरेको छ । नेप्से बढ्दा बुधबार एभरेस्ट इन्स्योरेन्स कम्पनी, माहुली सामुदायिक लघुवित्त, नेपाल लाइफ इन्स्योरेन्स कम्पनीको संस्थापक सेयरमा ३० प्रतिशतभन्दा बढीको गिरावट देखिएको छ ।

सामान्यतयाः कुनै पनि कम्पनीको सेयर मूल्य एक दिनमा १० प्रतिशतभन्दा बढीले घटबढ हुन सक्दैन । तर, बुधबारको कारोबारमा सबैभन्दा बढी एभरेस्ट इन्स्योरेन्सको सेयर मूल्यमा एकैदिन ४५ दशमलव ३३ प्रतिशतको गिरावट आएको छ । त्यसैगरी माहुली सामुदायिक लघुवित्तका लगानीकर्ताले ३४ दशमलव ७३ प्रतिशत गुमाएका छन् भने नेपाल लाइफ इन्स्योरेन्स कम्पनीको प्रमोटर सेयरको मूल्य २९ दशमलव ७२ प्रतिशतले घटेको छ ।