काठमाडौं । लोक नाटक ‘लिलामे माइलो’को मन्चनको अन्तिम तयारीमा पुगेको छ । थापागाउँस्थित कुञ्ज थिएटरमा नाटकको रिहर्सल भइरहेको हो ।

कुञ्ज नाटक घरको प्रस्तुति रहेको नाटक मंसिर १४ देखि पुस ७ गतेसम्म कुञ्ज नाटक घरमा मञ्चन हुनेछ । नाटकको कथा, निर्देशक प्रभाकर न्यौपाने हुन् भने यसलाई नाट्य रूपान्तरण राज थापा काउचाले गरेका छन् ।

नाटकमा सलमान गुरुङ, निशा पाख्रिन, राजन भुजेल, पुष्प अवस्थी, विजय नेपाल, विरेन्द्र खाती, अलविना न्यौपाने, विपना थापाको भूमिका रहनेछ । फोटोग्राफी डकुमेन्टेसन युसव गौतम गरेको थिएटरले जानकारी दिएको छ । 

मोरङ जिल्लाको पर्यटकीय क्षेत्र लेटाङ आसपासको मगर समुदायलाई आधार बनाएर नाटक तयार पारिएको निर्माण पक्षले जानकारी दिएको छ  । 

लिलामे माइलो नाटकको प्रोमोसन भिडियो पनि सार्वजनिक गरिएको छ । भिडियोमा मगर समुदायमा गाइने प्रख्यात हुर्रा गीत र लाफा नाच देखाइएको छ । नाटकको चरित्र निर्माणको लागि मोरङ जिल्लाको लेटाङ, राजारानी आसपासको क्षेत्रमा कलाकार टोली जाँदाको समयमा गरिएका विविध कृयाकलापलाई समेटिएको छ ।

यसैबीच नाटक निर्माण पक्षले ‘लिलामे माइलो’को ट्रोल बनाउनेलाई पुरस्कृत गर्ने समेत जनाएको छ । उत्कृष्ट ट्रोललाई नगद पाँचहजार पुरस्कार प्रदान गरिनेछ भने दुई जनालाई दार्जिलिङ घुमाउन लगिने बताइएको छ ।