काठमाडौं । होटल व्यवसायीहरूको छाता संगठन होटल एसोसिएसन नेपाल (हान) ले भारतको बैंगलोरमा नेपालको पर्यटन प्रवद्र्धनात्मक कार्यक्रम आयोजना गर्ने भएको छ । सन् २०२० मा २० लाख पर्यटक ल्याउने लक्ष्यमा सहयोग पुर्याउन हानले नेपाल पर्यटन बोर्ड, भारतस्थित नेपाली दूतावास तथा बैंगलोरमा बसोबास गरिरहेका नेपालीको सहकार्यमा आगामी मंसिर ३ गते ‘नेपाल प्रवद्र्धनात्मक कार्यक्रम’ आयोजना गर्ने जनाएको छ ।
नेपाली पर्यटन टोलीको नेतृत्व गर्दै बैंगलोर जान लागेका हान अध्यक्ष अमरमान शाक्यका अनुसार भारतका प्रधानमन्त्री नरेन्द्र मोदीको नेपाल भ्रमणपछि भारतीय पर्यटकको नेपाल भ्रमणमा उल्लेख्य वृद्धि भएको छ र यसलाई थप विस्तार गर्न त्यहाँका ट्राभल तथा टुर अपरेटरसँग नेपाली होटलको ‘बीटुबी’ बैठकसमेत गरिने छ ।
हानको अर्धवार्षिक साधारणसभा बैंगलोरमै आयोजना गर्ने जानकारी शाक्यले दिए । साधारणभामा ३५ भन्दा बढी होटल व्यवसायी सहभागी हुनेछन् । साधारणसभाले २०२० मा २० लाख पर्यटक ल्याउने लक्ष्य पूरा गर्न हानले सरोकारवाला निकायसँग सहकार्य गर्दै नीति निर्माण तहमा उपयुक्त सुझाव दिने हानले जनाएको छ ।
हानका महासचिव विनायक शाहले सरकारद्वारा १ सय नयाँ पर्यटन गन्तव्य पहिचान गरिएको र ती गन्तव्यमा लगानी विस्तार गर्न सरकार र निजी क्षेत्र मिलेर अघि बढ्नुपर्ने बताए ।