एजेन्सी । पछिल्लो समय एप्पलका मालिक टिम कुक र फेसबुकका कार्यकारी अधिकृत मार्क जुकरबर्कबीच सार्वजनिक रुपमै विवाद चलिरहेको छ । क्यामब्रिज एनालिटिकाको घटनालाई लिएर कुकले बारम्बार मिडियामा जुकरबर्गको आलोचना गरेपछि आक्रोशित हुँदै जुकरबर्गले फेसबुकका सबै कर्मचारीलाई आइफोन नचलाउन निर्देशन दिएको डेलीमेलले जनाएको छ । 

गत अप्रिलमा कुकले फेसबुकमाथि प्रयोगकर्ताका व्यक्तिगत जानकारी बेचेर विज्ञापन कमाइरहेको आरोप लगाएका थिए । यसरी जुकरबर्ग कानुनी विवादमा फसेका बेला पनि कुकले आफू जुकरबर्ग भएको भए त्यस्तो अवस्थामा कहिल्यै नहुने बताएका थिए । उनको सो भनाइप्रति जुकरबर्गले बारम्बार असन्तुष्टि जनाउँदै आएका छन् । 

तर फेसबुक मात्र नभएर पछिल्लो समय एप्पलले पनि प्रयोगकर्ताका जानकारी लिक गराएको खबर बाहिर आएपछि जुकरबर्गले कुकलाई जवाफ दिने मौका पाएका हुन् । यस्तोमा एप्पलविरुद्ध एन्ड्रोइडको समर्थन गर्दै जुकरबर्गले फेसबुकका सबै कामदारलाई आइफोन नचलाउन निर्देशन दिएका हुन् । 

त्यसैगरी जुकरबर्गले एप्पलका उत्पादनको मूल्यतर्फ संकेत गर्दै आफ्नो कम्पनीले निशुल्क सेवा प्रदान गर्दै विश्वका सबै स्तरका मानिसहरुलाई आफ्ना इष्टमित्रसँग नजिक ल्याउने मौका दिलाएको पनि ठहर गर्ने गरेका छन् ।  यस्तोमा लामो समयदेखिका प्रतिस्पर्धी फेसबुक र एप्पलबीच दुश्मनी सुरु भएको बताइन्छ । त्यसैगरी यो घटनापछि अब टिम कुकले फेसबुकको सार्वजनिक गर्दैगर्दा सचेत हुनुपर्ने अवस्था आएको बताइएको छ ।