काठमाडौं । बुकवर्म फाउन्डेसनले आयोजना गर्दै आएको साहित्य सम्मेलनको सातौं संस्करण पुस ७ देखि १० गतेसम्म पोखरामा हुने भएको छ । आईएमई ग्रुपले मुख्य प्रायोजन गर्ने ‘आईएमई नेपाल लिटरचेर फेस्टिभल’मा विभिन्न देशका ख्यातिप्राप्त लेखक, साहित्यकार आउँदैछन् । सम्मेलनबारे जानकारी दिन काठमाडौंको भृकुटीमण्डपस्थित नेपाल पर्यटन बोर्डमा सोमबार पत्रकार सम्मेलन आयोजना गरियो ।

कार्यक्रममा आईएमईका प्रबन्ध निर्देशक हेमराज ढकाल र आईएमई लिमिटेडका कार्यकारी प्रमुख सुमन पोखरेलले सम्मेलनमा जोडिन पाउँदा आफूहरू हर्षित रहेको बताए । सामाजिक उत्तरदायित्वका यस्ता कार्यक्रममा आफूहरूको सहभागिता अझ बढ्ने उनको भनाइ थियो ।

वरिष्ठ साहित्यकार खगेन्द्र संग्रौलाले सम्मेलन लेखकको उत्सवका रूपमा रहेको बताए । लेखकले पाठक भेट्ने र पाठकले आफ्नो मनपर्ने लेखक भेट्ने अवसर पनि सम्मेलन रहेको भन्दै संग्रौलाले सामाजिक सञ्जालले पुस्तक पढ्ने बानी कम गराइदिएको र यस्तो प्रवृत्तिबाट जोगाउने माध्यम भनेकै पुस्तक रहेको टिप्पणी गरे ।

फेस्टिभलका निर्देशक अजित बरालले उमेरको हिसाबसँगै फेस्टिभलले आफ्नो उचाइमात्र नभई विश्वास पनि बढाएको बताए । नेपाली र अन्य भाषा र भूगोलका साहित्यलाई एउटै मञ्चमा ल्याएर मन्थन गर्ने, स्रष्टा र पाठकबीचको दूरी कम गर्ने र फरक विचारहरूलाई उत्तिकै सम्मानका साथ स्थान दिने जस्ता लोकतान्त्रिक अभ्यास मजबुत बनाउने काममा फेस्टिभल उत्प्रेरक बनेको उनको भनाइ थियो ।

सम्मेलनका कार्यकारी निर्देशक नीरज भारीले पोखराको पर्यटन क्षेत्रमा सहयोग गर्न पनि सम्मेलन पोखरामा आयोजना गर्न लागिएको धारणा राखे । पोखरालाई पर्यटनको हबका रूपमा विकास गर्न पनि सम्मेलनले सघाउने उनको भनाइ थियो ।

‘जहाँ शब्दहरू जीवन्त हुन्छन्’ भन्ने मन्त्रसहित सन् २०११ मा ललितपुरको झम्सिखेलबाट शुरू भएको यो साहित्य महोत्सवले सन् २०१७ मा सुन्दर शहर पोखरामा छैटौं संस्करण आयोजना गरेको थियो । शुरूवातका चार संस्करण काठमाडौं आयोजना गरिएका थिए । भूकम्प र नाकाबन्दीको प्रहारपछि पोखरा पुगेको थियो । त्यसयता पोखरामै सम्मेलन हुँदै आएको थियो । सम्मेलनलाई स्थानीय ‘र्‍यान्डम रिडर्स सोसाइटी’ले सघाउँदै आएको छ । पछिल्ला दुई संस्करण पोखराको पार्दीस्थित नेपाल पर्यटन बोर्ड परिसरमा भएका थिए । यसपटक फेवाताल किनारमा अवस्थित रत्न मन्दिरअगाडिको चौरमा हुने भएको छ ।

सम्मेनलमा बेलायती ग्राफिक नोभलिस्ट निकोला स्ट्रिटनसँग मास्टर वर्कसप तथा क्रिएटिङ हिरोइन्स प्रोजेक्टअन्तर्गतको प्रदर्शनी हुने आयोजकले जनाएको छ । 

सम्मेलनमा पाकिस्तानका मोहम्मद हनिफ, भारतकी नमिता गोखले, बेलायतकी डा. निकोला स्ट्रिटेन, क्यानडाकी मञ्जुश्री थापा, भारतका प्रज्ज्वल पराजुली, भारतका हरिश नाम्बियरलगायत सहभागी हुनेछन् । 

शनिबार ‘कर्टेन रेजर’

सन् २०१७ को छैटौं संस्करणदेखि सम्मेलन आरम्भको अनुभूति दिलाउन शुरु गरिएको ‘कर्टेन रेजर’ यसपटक मंसिर ८ गते शनिबार हुने भएको छ । ‘कर्टेन रेजर’मा काठमाडौंका साहित्यकार, लेखकका अतिरिक्त सञ्चारकर्मी, विभिन्न विधाका प्रतिष्ठित व्यक्तित्व, व्यावसायिक र व्यापारिक समूहका सदस्यलाई निमन्त्रणा गरी साहित्य र साहित्य महोत्सवबारे औपचारिक परिचय र झल्को दिइन्छ । यसपटकको ‘कर्टेन रेजर’मा प्रख्यात भारतीय लेखक गुरचरण दास सहभागी हुनेछन् । ‘इन्डिया अनबाउन्ड’, ‘द डिफिकल्टी अफ बिइङ गुड’, ‘इन्डिया ग्रोज एट नाइट’जस्ता चर्चित पुस्तकका लेखक दासको हालैमात्र ‘कामः द रिडल अफ डिजाएर’ आख्यान प्रकाशित छ । लेखक, टिप्पणीकारसँगै भारतीय आम बौद्धिकको छवि बनाएका दासले ‘कर्टेन रेजर’मा आफ्नो नयाँ पुस्तकमा केन्द्रित रहेर मुख्य मन्तव्य दिनेछन् ।

लेखक दासको मन्तव्यपछि अर्का पोखरेली गायक धर्मेन्द्र सेवानले आफ्ना बुवा बुद्धि परियारको असाध्यै चर्चित गीत ‘रेशम फिरिरी’सँगै आफ्ना नयाँ पुराना केही गीतमा ‘अनप्लग्ड’ प्रस्तुति दिनेछन् ।