काठमाडौं । राष्ट्रिय पुनर्निर्माण प्राधिकरणका प्रमुख कार्यकारी निर्देशक सुशील ज्ञवालीले चालु आर्थिक वर्षभित्र निजि आवास पुनर्निर्माण कार्य सम्पन्न गर्ने बताएका छन् । संघीय संसदीय विकास तथा प्रविधि समितिको मङ्गलबारको बैठकमा प्रमुख निर्देशक ज्ञवालीले यस्तो बताएका हुन् । 
“आर्थिक वर्ष ०७५–७६ भित्र स्वीकृत बस्ती भूमिहीन, गुनासो सुनुवाई र परम्परागत बस्ती बाहेकका निजी आवास पुनर्निर्माण कार्य सम्पन्न गराइने छ,” ज्ञवालीले भने, “यसका लागि प्रत्येक स्थानीय तहबाट पुनर्निर्माण कार्ययोजना तयार पारी कार्यान्वयन गराइने छ ।”
प्रत्येक स्थानीय तहमा एकजना सिनियर इन्जिनियरको व्यवस्थासहित निजी आवास पुनर्निर्माण कार्यको निरीक्षण र सिफारिस एवम् एकीकृत बस्ती विकास तथा स्थानीय पूर्वाधार योजनाहरुको कार्यान्वयन स्थानीय तहबाटै गराइने भएकाले पुनर्निर्माणले गति लिएको ज्ञवालीले बताए ।
गुनासो सुनुवाई तथा र पुनः सर्वेक्षण कार्य स्थानीय तहमा कार्यरत इन्जिनियरहरुले नै गर्ने व्यवस्था साथै स्थानीय तहमा हुने पुनर्निर्माणसम्बन्धी कार्यको समन्वय, सहजीकरण र अनुगमनका लागि सम्बन्धित पालिकाका अध्यक्ष वा प्रमुखको संयजकत्वमा स्थानीय पुनर्निर्माण समन्वय समिति गरिएको पनि प्रमुख निर्देशक ज्ञवालीले बताए । 
पुनर्निर्माण कार्यमा स्थानीय समुदायलाई परिचालन गर्न यथाशिघ्र प्रत्येक टोल एवम् बस्तीहरुमा पुनर्निर्माण सामुदायिक समितिहरुको गठन गरी सबै स्थानीय तहमा सामाजिक परिचालक एवम् प्राविधिकहरुको व्यवस्था मिलाउने तयारी रहेको छ ।
प्राधिकरणले एकीकृत बस्तीका लागि पूर्वाधार निर्माणार्थ प्रतिघरधुरी तराई क्षेत्रमा रु. ३ लाख, पहाडी क्षेत्रमा ४ लाख र हिमाली क्षेत्रमा ५ लाखको व्यवस्था गरेको छ ।
हालसम्म समुदाय एवम् स्थानीय तहबाट २९ वटा एकीकृत बस्तीको लागि माग भई आएको प्राधिकरणले जनाएको छ । बैठकमा सांसदहरुको कोरम नपुगेको भन्दै केहीबेरबाट अर्को जानकारी नभएसम्मका लागि स्थगित भएको थियो ।