काठमाडौं । आर्थिक वर्ष २०७३–७४ मा व्यक्तिगत आयअन्तर्गत सबैभन्दा बढी आम्दानी कर बुझाउने सिद्धार्थ शमशेर ज.ब.रा र व्यापार कम्पनीअन्तर्गत सिप्रदी ट्रेडिङ सम्मानित भएका छन् । ज.ब.रा सिप्रदीका कार्यकारी अध्यक्ष हुन् ।
सातौं राष्ट्रिय कर दिवसका अवसरमा आयोजित कार्यक्रममा सिप्रदी र ज.ब.रालाई आन्तरिक राजश्व विभागले सम्मान गरेको हो ।
ज.ब.राले आव २०६८–६९ देखि लगातार ५ वर्ष सर्वाधिक कर बुझाउने व्यक्ति भएका हुन् । उनको कंम्पनी सिप्रदीले पनि आव २०६९–७० यता लगातार ४ वर्ष सर्वाधिक बढी कर बुझाएको छ ।
ज.ब.रा. सिप्रदीका कार्यकारी अध्यक्ष हुनुका साथै नेपालमा विभिन्न किसिमका व्यवसायलाई संगठित एवं विस्तारित गराउन भूमिका निर्भाह गर्दै आएका छन् ।
राणा शिक्षा, आर्थिक विकास, सम्पदा सुरक्षा र वन्यजन्तु संरक्षणका क्षेत्रमा आफूलाई एक प्रतिवद्ध व्यक्तित्वका रूपमा चिनाएका छन् । उनले नेपालका ग्रामिण भेगमा स्वास्थ्य र शिक्षा क्षेत्रमा कार्यरत ‘हेल्प नेपाल नेटवर्क’लाई व्यक्तिगत रूपमा सबै भन्दा धेरै एकल दान प्रदान गरेका छन् ।
यसैगरी सिप्रदीले विगत ३७ वर्षदेखि नेपालमा सवारी र सहयोगी व्यवसायमा प्रमुख भुमिका निर्वाह गर्दै आएको छ । सिप्रदी नेपालका लागि टाटा मोटर्सको एकमात्र आधिकारिक बिक्रेता हो । कम्पनीले म्याक लुब्रिक्यान्ट, मिसेल टायर्स, एक्साइड ब्याट्रि र टाटा हाताचिजस्ता अन्य उत्पादनको पनि बिक्रि तथा वितरण गर्दै आएको छ ।