काठमाडौं । प्रशिक्षकसँग सम्पर्कमा नरहेको भनिएका एपिएफका राष्ट्रिय रक्षक आदित्य चौधरीले मोटरसाइकल दुर्घटनामा परी आराममा रहेको बताएका छन् । तिहारअघि दुर्घटनामा परेका आदित्यले अहिले आफू सर्लाहीस्थित घरमै आराम गरिरहेको बताए ।
सहिद स्मारक ‘ए’ डिभिजन लिगअन्तर्गत सोमबार फ्रेन्ड्स क्लबविरुद्ध १–० को जित निकाल्दा रक्षापंक्तिमा संघर्ष गर्नुपरेपछि विभागीय टिम एपिएफका प्रशिक्षक राजेन्द्र तामाङले आदित्य सम्पर्कमा नरहेको बताएका थिए ।
प्रशिक्षक तामाङको भनाइप्रति असन्तुष्टि पोख्दै आदित्यले भने, “तिहार अगाडि बाइक दुर्घटनामा परेर मेरो खुट्टामा आठ टाँका लगाउनुपर्यो । सर्लाहीमै उपचार भयो । तर, मैले तत्काल क्लब र कार्यालयमा खबर गरेको थिएँ । मसँग प्रशिक्षकको नम्बर थिएन, त्यसैले उहाँलाई खबर गर्न पाइन ।”
घरेलु प्रतियोगितामा एपिएफको रक्षापंक्ति सम्हाल्दै आएका आदित्यले जारी लिगमा विभागीय टोलीबाट एक खेलमात्र खेलेका छन् । पहिलो खेलमा मैदान उत्रिएका उनी दोस्रो खेलमा अनुपस्थित थिए ।
राष्ट्रिय टोलीका भरपर्दा पिलरका रुपमा रक्षापंक्ति सम्हालिरहेका चौधरी नहुँदा टिमलाई दबाब परे पनि उनी आफ्नो सम्पर्कमा नरहेको प्रशिक्षक तामाङले सोमबारको खेलपछिको पत्रकार सम्मेलनमा बताएका थिए ।
“हिजोको खेलपछि गुुरुले टिम म्यानेजरलाई समेत खबर नगरी आदित्य चौधरी सम्पर्कमा छैन भन्नुुभएछ,” बाह्रखरीसँगको टेलिफोन कुराकानीमा आदित्यले भने, “उहाँहरुले पनि आफ्नो खेलाडीको खोजी गर्नुपर्ने हो । तर, खै केही वास्तै गरेनन् । राम्रोसँग हिँड्न मिल्दैन । त्यसैले घरमा आराम गरिहेको छुु । प्रशिक्षकले जे पायो, त्यही भनेका रहेछन् ।”
डाक्टरको सल्लाहबमोजिम अझै ४—५ खेल गुमाउन सक्ने अवस्था रहेको उनले बताए । “भर्खरै टाँका काटिएको छ । विस्तारै हिँडिरहेको छु । अब २—४ दिनमा काठमाडौं आउँछु । त्यसपछि फेरी जाँच गराएर डाक्टरको सल्लाहअनुसार लिगमा फर्किन्छु ।”