काठमाडौं । लेखक ब्रजेश खनालको संस्मरणात्मक पुस्तक ‘साइड हिरो’ बजारमा आएको छ ।
‘साइड हिरो’ रेडियो, टेलिभिजन र सिनेमामा ब्रजेशको तीन दशक लामो अनुभवको रोचक संस्मरण हो । पुस्तकमा लेखकले मनोरन्जन क्षेत्रमा आफ्ना तीता–मीठा अनुभव र तिनले जन्माएका विचारहरुलाई भावुक, रमाइलो, गम्भीर र मनोरन्जनात्मक शैलीमा पस्केका छन् ।
आफ्नो जीवन अनुभवलाई साइड हिरोको दृष्टिकोणबाट प्रस्तुत गरेर लेखकले संस्मरण लेखनको पद्दतिमा नयाँ ढाँचा निर्माण गरेका छन् । जुन आम पाठकका लागि सुरुचिपूर्ण र नवीन स्वादको लाग्ने छ ।
लेखक ब्रजेश आफ्नो किताबको बारेमा भन्छन् । “यो पुस्तक नितान्त मेरो व्यक्तिगत अनुभव र भोगाइमा आधारित छ । यसमा आफ्ना उपलब्धिहरु र आफूले गाडेका झन्डाहरु होइन, आफूले गर्न नसकेका र असफलताका कथाहरुलाई बढी समेट्ने प्रयास गरेको छु । त्यसैले यो पुस्तकको शीर्षक ’हिरो’ नभएर ’साइड हिरो’ हो । यो पुस्तकले थोरै भए पनि नेपाली रेडियो, सिनेमा र टेलिभिजनको भित्री पाटो र त्यहाँका उकाली–ओरालीका बारे बुझ्न सघाएछ भने म मेरो प्रयास सफल भयो भन्ठान्छु ।”
लेखकका यस अघि ‘यायावर’ र ‘जुनेली’ उपन्यास प्रकाशित भैसकेका छन् र ती आम पाठकको रुचीमा पर्न सफल भएको छ ।
सांग्रिला बुक्सले प्रकाशन गरेको ‘साइड हिरो’ को पृष्ठ ३३६ रहेको छ र यसको मूल्य ४४८ रहेको सांग्रिला बुक्सले जनाएको छ ।