एजेन्सी । यस वर्ष गुगलको सर्च इन्जिनमा सबैभन्दा बढी खोजिएको शब्द ‘विश्वकप’ रहेको छ र त्यसमा पनि यसबारे विश्वमै सबैभन्दा धेरै खोजी गर्ने देश नेपाल रहेको छ । विशेषगरी काठमाडौँ क्षेत्रमा विश्वकपको समाचारबारे सबैभन्दा धेरैपटक खोजी भएकोे सो डाटामा उल्लेख गरिएको छ । यसरी विश्वकपमै सहभागी देशहरु भन्दा नेपालीहरुले यसमा बढी चासो देखाएको पाइएको हो । भारत भने यसमा ३४ औँ स्थानमा रहेको छ । २०१८ विश्वकप फुटबल रुसमै भएपनि यसबारे खोजी गर्नेमा रुस ६७ औँ स्थानमा परेको छ ।
त्यसैगरी सर्वाधिक खोजि गरिएको व्यक्तिमा भने राजकुमार ह्यारीसँग विवाह गरेकी अमेरिकी मोडल मेगान मार्कलको नाम आएको छ । गत मेमा भएको उक्त शाहि विवाहबारे पनि गुगलमा अत्यधिक खोजी गरिएको तथ्याङ्कले देखाएको हो । त्यस्तै मृत सेलिब्रेटीहरुमध्ये चाहिँ बलिउडकी अभिनेत्री श्रीदेवीको नाम पनि सर्वाधिक खोजी गरिनेमा नौ नम्बरमा परेको छ ।
टेलिभिजन कार्यक्रमहरुमा चाहिँ बालबालिकाहरु माझ लोकप्रीय मोटु पत्लु बढी सर्च गरिनेमा चौथो स्थानमा रहेको छ । यता प्रश्नहरुमा चाहिँ कसरी भन्नेमा मानिसहरुले फेसबुक र इन्स्टाग्राम कसरी डिलिट गर्ने भन्ने धेरैपटक सोधेको पाइएको हो ।
पछिल्लो समय फेसबुक, इन्स्टाग्राम लगायतका सामाजिक संजालले प्रयोगकर्ताका गोप्य जानकारी लिक गर्ने गरेको खबर बाहिर आएपछि धेरैले आफ्नो अकाउन्ट बन्द गराएका थिए । त्यस्तै ‘के हो’ भन्ने प्रश्नमा, यो वर्ष सबैभन्दा बढी सोधिनेमा ‘बिटकोइन के हो’ भन्ने रहेको छ ।