एजेन्सी । के भर्चुअल रियालिटी अर्थात भीआरले पुरुषहरुलाई महिलामाथिको दुर्व्यवहार अन्त्य गर्न सिकाउन सक्छ ? ‘भेन्टेज पोइन्ट’ नामक एउटा कम्पनीले महिला हिंसा रोक्न निकै अनौठो उपाय निकालेको छ ।
यस अन्तर्गत पुरुषले महिलामाथि गर्ने अनुचित व्यवहार तिनीहरुलाई नै नजिकबाट देखाइने गरिएको छ । भीआरमा देखाइने यी दृश्य अफिसमा हुने गरेका साँचो घटनामै आधारित हुने गर्दछन् । यसरी नजिकबाट सो घटना अवलोकन गर्र्दैगर्दा पुरुषहरुले आफ्ना गल्ती देख्ने र कस्तो व्यवहार गर्न नहुने भन्ने थाहा पाउन सक्ने कम्पनीकी संस्थापक मोर्गान मर्सरको भनाइ छ ।
उनका अनुसार अधिकांश पुरुषहरुले यौन दुर्व्यवहार सहनुपर्दा कस्तो महसुस हुन्छ भन्ने बुझेकै हुँदैनन् । यस्तोमा शुक्रबार मात्र ग्राहक विश्लेषण फर्मको एउटा टोलीलाई यो प्रशिक्षण दिइएको हो । जसमा सहभागी व्यक्तिले भनेका छन्, “एकजना पुरुष महिलाको धेरै नजिक बसिरहेका थिए जसले मलाई नै असहज महसुस गरायो । साथै ती महिलाले सो पुरुषका कमेन्टहरुमा दिएको प्रतिक्रियाले पनि एकदमै नराम्रो भाव प्रष्ट पारिरहेको थियो । त्यसबाट धेरै संकेत पाउन सकिँदो रहेछ ।”
यसरी पछिल्लो समय गुगल र पिडब्लुसी जस्ता ठूला कम्पनीहरुले आफ्ना कर्मचारीहरुलाई यो प्रविधिमार्फत प्रशिक्षण दिनमा चासो देखाइरहेका छन् । यसकारण पनि यो प्रविधिले वास्तवमै पुरुषहरुलाई यौन दुव्र्यवहारका रुपमा लिइने किसिमका बानी हटाउन मद्दत गर्ने मोर्गानले अपेक्षा गरेकी छन् । द इकोनोमिस्ट
