वाशिङटन । अमेरिकाको एक अदालतले एक जना भारतीय इन्जिनियरलाई ९ वर्षको जेल सजाय सुनाएको छ । ती इन्जिनियरलाई जहाजमा आफ्नो छेऊमा बसेकी महिलालाई यौन दुर्व्यवहार गरेकोमा दोषी ठहर गर्दै सो सजाय सुनाइएको हो ।
यसैवर्ष (सन् २०१८) को जनवरी महिनामा भएको घटनालाई लिएर अहिले अदालतले फैसला गरेको हो । ३४ वर्षीय प्रभु राममूर्ति जहाजमा आफनी पत्नी र पीडित महिलाको बीचमा बसेका थिए । पीडित महिलाको भनाईअनुसार घटना भएको बेलामा उनी सुतिरहेकी थिइन् । जब उनी सुतेर उठिन् त्यतिबेला उनको सर्ट र पाइन्टको बटन खुलेको थियो र राममूर्तिको हात उनको पाइन्टमा थियो । अमेरिकी अदालतले जनाएअनुसार सजाय पूरा भएपछि राममूर्तिलाई भारत फिर्ता गरिनेछ ।
डेट्रायट फ्रि प्रेसका अनुसार अभियोजनको पक्षले अदालतमा ११ वर्षको जेल सजाय हुनुपर्ने दाबी गरेपनि अदालतले दुई वर्ष घटाएर सजाय सुनाएको हो । आफ्नो फैसलामा न्यायाधीश टेरेन्स बर्गले घटनालाई गम्भीर अपराध बताउँदै ९ वर्षको सजाय पर्याप्त हुने जनाएका छन् । राममूर्तिले प्रहरीसँग प्रतिवाद गर्दै आफू पनि सो समयमा सुतिरहेको र त्यस्तो घटना नभएको बताएका थिए ।
मिचिगनको संघीय अदालतमा यस सम्बन्धी मुद्दा पेस हुनासाथै राममूर्तिलाई जेलमा राखिएको थियो । अभियोजकले उनलाई धरौटीको सुविधा दिइए भाग्न सक्ने भएकोले त्यस्तो सुविधा नदिन जिकीर गरेका थिए । राममूर्ति विरुद्ध यौन हमलाको आरोप लगाइएको थियो । पीडित महिलाले विमानबाट उत्रनुभन्दा केही अघि नै फ्लाइट क्रूलाई घटनाको बारेमा जानकारी दिएकी थिइन् ।
राममूर्तिकी पत्नीले चाहिँ पीडित भनिएकी ती महिला आफ्ना पतिको घुँडामा टाउको राखेर सुतिरहेको बताएकी छन् । त्यसैले उनले फ्लाइट क्रुलाई अर्कै सिटमा सारिदिन पनि आग्रह गरेकी थिइन् । तर, क्रूका सदस्यले जाँच अधिकारीलाई दिएको बयानमा पीडित महिलाले मात्रै सीट बदल्न आग्रह गरेको बताएका थिए ।
क्रू सदस्यले जनाएअनुसार जब पीडितले घटनाबारेमा जानकारी गराएकी थिइन् उनी रोइरहेकी थिइन् । त्यतिबेला उनको सर्टको बटमपनि खुल्लै थियो । त्यसपछि पीडित महिलालाई जहाजको पछाडिको भागमा सिट व्यवस्था गरिएको थियो । बीबीसी
