कोलम्बो । श्रीलंकाको प्रधानमन्त्रीमा रनिल बिक्रमासिंघे आइतबार पुनस्र्थापित भएका छन् । युनाइटेड नेसनल पार्टी (युएनडीपी)का नेता रहेका बिक्रमासिंघेले आइतबार राष्ट्रपति मैत्रिपाला सिरिसेनाबाट अपदस्थ भएको ५१ औं दिनमा पुनः उनै राष्ट्रपतिसँग प्रधानमन्त्रीको शपथ लिएका हुन् । उनलाई अपदस्थ गरेर प्रधानमन्त्री बनाइएका महेन्द्रा राजपाक्षले शनिबारमात्रै पदबाट राजीनामा दिएका थिए ।
राष्ट्रपतिको कदम अदालत र संसदले अस्वीकार गरेपछि बिक्रमासिंघेलाई पुनः प्रधानमन्त्री बन्न सजिलो भएको हो । उनलाई यसअघि प्रधानमन्त्रीबाट हटाइएपनि उनले प्रधानमन्त्रीको सरकारी निवास टेम्पल ट्री भने छोडेका थिएनन् । बिक्रमासिंघेको पार्टीको आधिकारिक ट्विटर पेजमा उनले आज शपथ लिइको जनाइएको छ । उनले चाँडै नयाँ मन्त्रिमण्डल बनाएर सन् २०१९को देशको बजेट ल्याउने तयारी गर्ने जनाइएको छ । उनलाई अक्टोबर २६मा प्रधानमन्त्री पदबाट अपदस्थ गरिएको थियो ।