काठमाडौं । नेपाल कम्युनिस्ट पार्टी (नेकपा)का स्थायी कमिटी सदस्यहरूले प्रधानमन्त्रीले राजनीतिक प्रतिवेदनमा सरकारको अकर्मण्यता ढाकछोप गरेको बताएका छन् । शनिबारबाट पार्टी मुख्यालयमा शुरू भएको स्थायी कमिटीको तेस्रो बैठकमा प्रस्तुत राजनीतिक प्रतिवेदनमाथि टिप्पणी गर्दै सदस्यहरुले प्रधानमन्त्रीले गल्तीको ढाकछोप गरेको बताएका हुन् ।
पार्टी अध्यक्षद्वयले प्रस्तुत गरेको प्रतिवेदनमा सरकारको ९ महिने उपलब्धिलाई सात बुँदामा सविस्तार चर्चा गरिएको छ ।
“पार्टी अध्यक्ष केपी ओलीको कार्यशैलीकै कारण सरकार असफलतातिर उन्मुख छ, तर राजनीतिक प्रतिवेदनमा यी कुरालाई लुकाइएको छ,” स्थायी कमिटीका एक सदस्यले भने । उनले वामदेवको फरक मतले काउन्टर दिएको चर्चा गर्दै उनको कुरा समेटेर र सम्बोधन गरेर जानुको विकल्प नरहेको बताए ।
“प्रतिवेदनका पछाडि जेसुकै नियत भए पनि उहाँले उठाएका कुरा जेन्युन छन्,” अर्का एक सदस्यले भने, “सुनुवाइ गरेर जानुको विकल्प छैन ।”
गौतमले केपी ओली प्रधानमन्त्री र सरकारको दुवैको नेतृत्व गर्न असफल भइसकेको निष्कर्ष निकाल्दै स्थायी कमिटीको बैठकमा १६ पाने फरक मत दर्ता गराएका छन् र यसमा छलफलको माग गरेका छन् ।
तर, अध्यक्ष केपी ओलीले दुई अध्यक्षलाई फुटाउने मनशाय प्रकट भएको आरोपित गर्दै इन्कार गर्ने सम्भावना पनि उत्तिकै छ ।
त्यस्तै केपी ओलीले सरकारको जिम्मेवारी सम्हालिरहेकाले पार्टीको जिम्मेवारी अर्का अध्यक्ष पुष्पकमल दाहाललाई दिइनुपर्ने गौतमको तर्क छ ।

‘अध्यक्ष ओलीले प्रतिशोधको भावना त्याग्नुपर्छ’
दम्भ, भिन्न विचारप्रति असहिष्णु, प्रतिशोधको भावनाले अघि बढ्दा पार्टी र सरकार सञ्चालन गर्न अध्यक्ष ओलीको भूमिका कमजोर र फितलो देखिएको भन्दै कार्यशैली बदल्न नेताहरूले ध्यानाकर्षण गराएका छन् । स्थायी कमिटी बैठक चलिरहँदा केही नेताहरूले उनलाई विगतको प्रतिशोधको भावना त्याग्न र एकतावद्ध ढंगले अभिभावकत्व निभाउने गरी अघि बढ्नसमेत सुझाव दिएका छन् ।
त्यस्तै दुवै अध्यक्षलाई एकताको बाँकी काम नरोक्न र तलसम्म एकतालाई पुर्याउन भूमिका खेल्नसमेत अनुरोध गरेका छन् ।