काठमाडौं । परराष्ट्र मन्त्री प्रदीपकुमार ज्ञवाली सोमबार अमेरिका प्रस्थान गर्दैछन् । अमेरिकी विदेश मन्त्री माईकल आर पोम्पिओको औपचारिक निमन्त्रणामा उनी अमेरिका जान लागेका हुन् । परराष्ट्र मन्त्रालयका अनुसार वासिङटन डिसीमा मंगलबार दुई देशका परराष्ट्र मन्त्रीबीच द्विपक्षिय वार्ता हुनेछ ।
डिसेम्बर १८ को दिन (मंगलबार) ज्ञवाली र अमेरिकी विदेशीमन्त्रीबीच द्विपक्षिय बैठक हुने तय भएको छ । अमेरिका भ्रमणको बेला परराष्ट्र मन्त्री ज्ञवालीले ह्वाईट हाउसका उच्च पदस्त अधिकारी, अमेरिकी अन्तर्राष्ट्रिय विकास नियोग (युएसएआईडी)का प्रतिनिधि र मिलिनियम च्यालेन्ज कोअप्रेसन (एमसिसी)का पदाधिकारीसँग पनि भेटवार्ता गर्ने कार्यक्रम रहेको परराष्ट्रले जनाएको छ ।
डिसेम्बर १८ कै दिन पराष्ट्र सचिव शंकर दास वैरागीले दक्षिण तथा मध्य एसिया मामिला हेर्ने अमेरिकी उपविदेश मन्त्री एलिस जी वेल्ससँग परामर्श गर्ने जनाइएको छ । परराष्ट्र मन्त्री ज्ञवालीको अमेरिका भ्रमणमा परराष्ट्र सचिव वैरागी, अमेरिकाको लागि नेपाली राजदूत अर्जुनकुमार कार्की, परराष्ट्र मन्त्रालयको युरोप–अमेरिका महाशाखा प्रमुख तथा सहसचिव घनश्याम भण्डारी, गहृ र अर्थ मन्त्रालयका सहसचिवहरु पनि सँगै जानेछन् । उनको पुस ६ गते स्वदेश फर्कने कार्यक्रम छ ।