महेन्द्रनगर । भीमदत्त नगरपालिका वडा नं ९ खल्ला टुँडिखेलका तीन सय वासिन्दाले निःशुल्क स्वास्थ्य शिविरबाट स्वास्थ सेवा लिएका छन् । भीमदत्त नगरपालिका, सुदूरपश्चिम फार्मेसी संगठन र सुर्योदय बहुउद्देश्यीय सहकारी संस्थाले सन्तनगरमा संयुक्त शिविर आयोजना गरेका हुन् । शिविरबाट खल्ला, टुँडिखेल र मुसेट्टीका वासिन्दा लाभाान्तित भएका भएका छन् ।
सन्तनगरस्थित भीमदत्त स्मृति आधारभूत विद्यालयमा शिविर आयोजना गरिएको हो । शिविरमा स्थानीयको स्वास्थ्य जाँच गरी औषधि समेत वितरण गरिएको छ ।
सूर्योदय बहुउद्देश्यीय सहकारी संस्थाका लिका सल्लाहकार ईश्वरी प्रसाद खरेलले शिविरबाट तीन सय जनाले स्वास्थ्य सेवा पाएको जानकारी दिए ।
विहान ८ बजेदेखि दिउँसो ३ बजेसम्म शिविर सञ्चालन गरिएको हो । सूर्योदयका सल्लाहकार खरेलले उद्घाटन गरेको शिविरको समापन समारोहमा भीमदत्त नगरपालिकाका नगर प्रमुख सुरेन्द्र विष्ट प्रमुख अतिथि थिए ।
कार्यक्रममा नगर प्रमुख विष्टले खल्ला मुसेट्टीका वासिन्दाले विगतमा वासिन्दाले सिटामोल पाउन नसकेका समाचार आउने गरेको उल्लेख गर्दै त्यस्तो अवस्था अन्त्यका गर्नका लागि शिविर आयोजना गरिएको बताए । भीमदत्त नगरपालिका दिगो विकासको अवधारण टेकेर अघि बढेकाले समस्यालाई समाधान गरी समृद्ध नगर बनाइने उनले बताए । किसान नेता भीमदत्त पन्तले गरीब वर्गका वासिन्दाका लागि नून आन्दोलन सुरु गरेको खल्ला क्षेत्रमा स्थानीयका लागि आय आर्जनका कार्यक्रम सञ्चालन गरिने नगर प्रमुख विष्टले बताए ।
स्थानीय तह निर्वाचनपछि नगर प्रमुख विष्टले गत वर्ष पहिलो पटक खल्लामा विशेषज्ञ चिकित्सक सहितको स्वास्थ्य शिविर आयोजना गरेका थिए । टुँडिखेलका गाउँघर क्लिनिक नियमित रुपमा सञ्चालनमा आएको छ । गत वर्ष क्लिनिक भवन निर्माण गरिएको थियो ।
शिविरमा डा बैभव भट्ट, डा निरज संग्रौला, डा प्रशान्त जोशी, डा सरोज सिटौला, डा राजु पौडेलको टोलीले स्वास्थ्य जाँच गरेको थियो ।
कार्यक्रममा ब्रह्मदेबस्थित नगर स्वास्थ्य इकाई र टुँडिखेलको गाउँघर क्लिनिकलाई औषधि प्रदान गरिएको छ । सुदूरपश्चिम फार्मेसी संगठनका अध्यक्ष प्रितिधिर भण्डारीले औषधि हस्तान्तरण गरेका थिए ।