एजेन्सी । लिभरपुलका प्रशिक्षक योर्गान क्लोपले आइतबार परम्परागत प्रतिद्वन्द्वी म्यानचेस्टर युनाइटेडलाई घरेलु मैदान एनफिल्डमा आतिथ्य प्रदान गर्दा आफ्नो टोलीले ‘रिसाएर’ खेल्ने बताएका छन् । 
युनाइटेडलाई पराजित गरे लिभरपुल पुनः लिगको शीर्ष स्थानमा उक्लनेछ । तर जर्मन प्रशिक्षक क्लोपले च्याम्पियन्स लिगमा पराजित युनाइटेड तत्काल जितको खोजीमा भएका कारण खेलाडीलाई सजग गराएका छन् । 
“विपक्षी टोली सुखद् क्षणमा छैन । उनीहरु पछिल्लो खेलमा पराजित भएका थिए,” लिभरपुलका प्रशिक्षक क्लोपले भने, “हामी आफ्नै समस्यामा छौं । हाम्रो आफ्नै लक्ष्य छ र हामी त्यसका लागि खेल्छौं । हाम्रो लडाइँ अंकका लाग हुन्छ । आइतबार हामी रिसाएर खेल्नुपर्छ ।”
लिभरपुल २०१३ यता युनाइटेडसँग एनफिल्डमा पराजित भएको छैन । तथापी लिभरपुलले पछिल्लो ८ लिग खेलमा युनाइटेडलाई पराजित गर्न पनि सकेको छैन । लिगमा अहिले लिभरपुल र युनाइटेडबीच १६ अंकको भिन्नता छ । युनाइटेड शीर्ष क्लब म्यानचेस्टर सिटीभन्दा रेलिगेशन क्षेत्रको टोलीसँग नजिक छ । लिभरपुलका प्रशिक्षक क्लोपले टोलीका लागि यो ऐतिहासिक अवसर भएको बताए । 
“यो खेल जित्नका लागि सबै विकल्प प्रयोग हुन्छ,” प्रिमियर लिगको शीर्ष पाँचमध्ये एकमात्र अपराजित टोली लिभरपुलका प्रशिक्षक क्लोपले थपे, “ठूलो खेलमध्येको यो एक हो । युनाइटेडका पूर्व प्रशिक्षक (सर एलेक्स फुर्गसन)ले यसलाई ब्रिटिस क्लासिको भनेका हुन् भने म साँच्चिकै खुशी छु । किनकी म जर्मन क्लासिको (बोरुसिया डर्टमन्डविरुद्ध बायर्न म्युनिख) मा संलग्न भैसकेको छु ।”
प्रशिक्षक जोजे माउरिन्हो २०१६ मा ओल्ड ट्राफोर्ड आएपछि युनाइटेड चीर प्रतिद्वन्द्वीविरुद्ध नतिजा निकाल्न संघर्ष गरिरहेको छ । युनाइटेडले लिगमा म्यानचेस्टर सिटी, लिभरपुल, चेल्सी, टोटेनह्याम र आर्सनलसँग गरी संयुक्त रुपमा २४ खेल खेलेको छ । जसमा युनाइटेड ८ खेलमा मात्र विजयी भएको छ । 
लिभरपुल उपाधि होडमा नजिक रहे पनि युनाइटेडका प्रशिक्षक जोसे मोउरिन्होले क्लोपको टोलीलाई २००५ मा च्याम्पियन्स लिग जित्दा जस्तो बलियो नमानेको बताएका छन् । 
“मैले लिभरपुलविरुद्ध खेलेको छु । त्यो युरोपियन च्याम्पियन थियोे,” माउरिन्होले भने, “अहिले त्यो भन्दा राम्रो छ वा छैन मलाई थाहा छैन । यो टिमले केही जितेको छैन । त्यसैले मलाई लाग्छ उनीहरुले जे हासिल गरेका छन्, त्यसलाई सम्मान गर्नुपर्छ । उनीहरु राम्रो टिम हो । उनीहरु खेल्ने गतिले खेल कठिन हुन्छ । उनीहरुलाई रोक्दै हामीले राम्रो खेल्नुपर्छ । हामी आफुमा केन्द्रित हुनु महत्वपूर्ण छ । हेरौ हामी कसरी उनीहरुलाई स्तब्ध बनाउँछौं र गोल गछौं ।”
इङ्लिस प्रिमियर लिगमा आजै आर्सनलले साउथह्याम्पटनविरुद्ध तथा चेल्सीले ब्राइटनविरुद्ध खेल्नेछ ।