काठमाडौं । राष्ट्रिय सतर्कता केन्द्रले देशभरका ५ सय ३० जना सरकारी कर्मचारीलाई कारवाहीका लागि सिफारिस गरेको छ । अनुगमन अझै जारी रहेकाले अन्य थुप्रै कर्मचारी कारवाहीमा पर्नसक्ने केन्द्रले जनाएको छ ।
केन्द्रले प्रत्येक वर्ष विभिन्न सरकारी कार्यालयहरुमा व्यापक अनुगमन र कारवाही गर्ने गरेपनि संख्यात्मक रुपमा कमी भने आउन सकेको छैन । त्यस्ता कर्मचारीलाई गरिने फितलो कारबाहीले अनुगमन कार्य प्रभावकारी हुन नसकेको विज्ञहरु बताउँछन् ।  
गत वर्षपनि केन्द्रले छड्केमा परेका, पोशाक नलगाएका र अन्य क्रियाकलापमा संलग्न कर्मचारीलाई कारबाही गरिएको जानकारी दिएको छ । गत वर्ष ४२ जिल्लाका १ हजार १ सय ४० वटा सरकारी कार्यालयका २ हजार ३ सय ४० जना कर्मचारीलाई कारबाही गरिएको थियो । 
केही जिल्लाका कार्यालयहरुको रिपोर्ट आउन बाँकीनै रहेको केन्द्रका प्रवक्ता विष्णुराज लामिछानेले बताए । ८ वटा टोलीले एकसाथ अनुगमन गरिरहेको र बाँकी २ सय ५० कार्यालयहरुको अनुगमन पूरा भैसकेपछि ‘डाटा एन्ट्रि’ गरिने प्रवक्ता लामिछानेको भनाइ छ । चालु आर्थिक वर्षको मंसिर १० गतेसम्म मुलुकभरका १ सय ४० सरकारी कार्यालय अनुगमन गर्दा ५ सय ३० जना कर्मचारी कारवाहीमा परेको उनले जानकारी दिए । 
कारवाहीमा पर्ने त्यस्ता कर्मचारीहरु समयमा नआउने, कार्यालय समयमा नभेटिने र कार्यालयको सामान्य अनुशासन समेत पालना नगर्ने ३ सय ६८ जना रहेका छन् । त्यस्तै कार्यालयमा पोशाक नलगाउने तथा गैरजिम्मेवार व्यवहार देखाउने १ सय ६५ जना सहित ५ सय ३० जना कर्मचारीहरुलाई कारवाहीका लागि सिफारिस गरिएको प्रवक्ता लामिछानेले जानकारी दिए । त्यस्ता कर्मचारीलाई कारवाही गर्न सम्बन्धित कार्यालयहरुमा पत्र पठाइसकेको उनले बताए ।
छड्केमा परेका तथा कार्यालयको सामान्य अनुशासनसमेत पालना नगर्ने कर्मचारीहरुलाई पहिलोपल्ट चेतावनी दिने, सचेत गराउने, तलब तथा बिदा कटौती गरिनेजस्ता कारवाही गर्ने गरिन्छ । तर, पटक–पटक नियम उल्लघंन गरेको भेटिए विभागिय कारबाही समेत गरिन्छ । त्यस्तोे कारवाही गर्ने अधिकार भने सम्बन्धित कार्यलयसँगै हुने उनले जानकारी दिए ।