काठमाडौं । आइतबार नेप्से परिसूचकमा उल्लेखनीय सुधार आएको छ । साताको पहिलो दिने नेप्से परिसूचक १८ अंकले बढेको हो ।
आइतबारको सुधारसँगै विगत डेढ हप्तादेखि बढिरहेको बजारले सुधारको निरन्तरता पाएको छ । यो सुधारले साढे दुई महिनादेखि आरालो लागिरहेको बजारलाई केही राहत मिलेको छ भने परिसूचक तीन साता अगाडिको बिन्दुमा पुगेको छ । यसअघि मंसिर ९ गते परिसूचक ११ सय ६६ अंकमा कायम भएको थियो ।
सेयर लगानीकर्ताको मागबमोजिम पुँजीबजार विकाससम्बन्धी दिशानिर्देशक दस्तावेज बुधबार आउने सम्भावना बढेको दिन सेयर बजार बढेको हो । पछिल्लो समय बैंकहरुले ब्याजदरसम्बन्धी गरेको भद्र सहमतिले सेयर बजारलाई सकारात्मक सन्देश दियो । आइतबार नै नेपाल एसबीआई बैंकले लगानीकर्तालाई आकर्षक प्रतिफल दिने समाचार आएको थियो ।
यता, केही लगानीकर्ता निरन्तर सेयर बजारको दीर्घकालीन सुधारका लागि अनसनमा बसेका छन् । उनीहरुकै निरन्तर दबाबका कारण बनेको समितिले अहिले पुँजीबजार विकास र सुधारको दिगो आधारस्तम्भ बन्ने क्रममा छ । प्रतिवेदन बुधबार आउने बताइएको छ ।

पुँजीबजार सुधार प्रतिवेदन बुधबारमात्रै, लगानीकर्ता भोलिदेखि आमरण अनसन बस्ने

आइतबार बजारमा सुधार आउनको कारण पहिलो डेढ घन्टाको क्रमिक सुधार प्रमुख कारण बन्यो । त्यसपछि केही सेयरको मूल्य घट्दा परिसूचकले उल्टो गति लिएपनि पुनः सुधारिँदै १८ दशमलव ८९ अंकको सुधार आत्मसात् गरेको हो ।
नेप्से बढेर १ हजार १ सय ६७ अंकमा कायम भएको दिन आइतबार करिब डेढ अर्बको सेयर किनबेच भएका छन् । यसदिन बजारमा १ सय ५९ कम्पनीका १४ लाख ७ हजार कित्ता सेयर कारोबारमा आए । कारोबार रकम अघिल्लो दिनभन्दा एक–तिहाइ अर्थात् १५ करोड रुपैयाँ बढी हो ।
यसदिन सेन्सिटिभ इन्डेक्स ३ दशमलव ९८ अंकले बढेर २ सय ४८ दशमलव ६७ अंकमा कायम भएको छ । नेप्से बढेको दिन आइतबार कारोबारमा आएका ११ मध्ये १० समूहका उपसूचक बढे । उत्पादनमूलक समूह घटेको दिन आइतबार निर्जीवन बीमा समूह सर्वाधिक १ सय ६७ दशमलव २१ अंक र जीवन बीमा समूह १ सय ३३ दशमलव ३७ अंकले बढ्यो ।
यसदिन कारोबारमा आएका कम्पनीमध्ये छिमेकी लघुवित्तको सेयर कारोबारले अग्रता लियो । कम्पनीका ५ करोड ७७ लाख रुपैयाँको कारोबार भएकोमा नेपाल बैंकको ५ करोड ३२ लाख रुपैयाँको कारोबार हुँदै दोस्रो स्थान आगट्यो ।
यसदिन मिर्मिरे लघुवित्तका लगानीकर्ताले सर्वाधिक कमाए । कम्पनीको सेयरमूल्य १० प्रतिशतले बढ्दा अन्य २ कम्पनीको सेयर मूल्य पनि करिब १० प्रतिशतले बढ्यो । यसदिन गुमाउने १८ कम्पनीका लगानीकर्तामध्ये रैराङ हाइड्रोका लगानीकर्ता शीर्षमा रहे ।