काठमाडौं । गोपाल किराँती नेतृत्वको नेकपा (माओवादी केन्द्र) सरकारविरुद्ध आन्दोलनमा होमिने भएको छ । पार्टीको हालै सम्पन्न केन्द्रीय सचिवालय बैठकले सरकारले धर्मनिरपेक्ष राष्ट्रलाई कमजोर बनाएको, मुलुकलाई झनै परनिर्भरताको बाटोमा धकेलेको आरोप लगाउँदै सरकारविरुद्ध आन्दोलनमा होमिन सबैलाई आह्वान गरेको हो । 
आइतबार काठमाडौंमा पत्रकार सम्मेलन गरी बैठकका निर्णयहरु सार्वजनिक गर्दै पार्टीका अध्यक्ष किराँतीले धर्मनिरपेक्षता र गणतन्त्रलाई कमजोर बनाउने काम सरकारले गरेकाले त्यसका विरुद्ध आन्दोलनमा होमिन आह्वान गर्नुपरेको बताए । उनले राष्ट्रिय स्वाधीनता र आत्मनिर्भरताका साथ मुलुकलाई अघि बढाउन वर्तमान सरकार असफल भएको भन्दै चर्को आलोचना समेत गरे ।
पार्टीले आगामी फागुन १ गते जनयुद्ध दिवसको अवसर पारेर महाधिवेशन गर्ने तयारी पनि गरेको छ । अध्यक्ष किराँतीले महाधिवेशनको तयारीका लागि पुस ११ गतेदेखि २५ गतेसम्म सबै प्रदेशको अधिवेशन सम्पन्न गर्ने निर्णय गरेको पनि जानकारी दिए ।