काठमाडौं । डोटीका दर्शन ओलीले एभरेष्ट प्रिमियर लिगमा एक्सपर्ट सिङ्गल ह्यान्डेड क्याच गर्दै ५० हजार रुपैयाँ पाएका छन् । शुक्रबार चितवन टाइगर्स र भैरहवा ग्लाडियटर्सविरुद्धको खेलमा चितवनका जर्ज स्टकले प्रहार गरेको बललाई ओलीले एक हातले क्याच गरेपटिछ ५० हजार पाएका हुन् ।
महेन्द्र मावि डडेलधुरामा सिभिल इन्जिनियरिङ पढ्दै गरेका ओली ट्युसनका लागि काठमाडौं आएको बताएका छन् । जर्ज स्कटको उक्त प्रहार सम्झँदै उनले भने, “घरबाट आउँदा क्याच गर्छु भन्ने सोचेको थिइन तर, दर्शक दिर्घामा बसिरहँदा बल एक्कासि आयो । क्याच हुन्छ भन्ने सोचेको थिएन । तर, यसो हात दिएको क्याच बल रहेछ, क्याच भयो ।”
प्रतियोगिताको समूह चरणका खेल सकिन लाग्दा २ जनाले मात्रै सिङ्गल ह्यान्डेड क्याच लिएका छन् । त्यसैमध्येका एक ओली ईपीएलको टिममा ललितपुरको प्रशंसक रहेको बताउँदै नेपालका क्रिकेटरमा राष्ट्रिय क्रिकेट टिमका कप्तान पारस खड्काको फ्यान भएको बताए ।
“म गाउँमा कहिलेकाही क्रिकेट पनि खेल्थे,” आयोजकले ५० हजार पाएको घोषणा गरिसकेपछि सञ्चारकर्मीहरुसँग भने । ईपीएलको सुुरुदेखि नै उनी टिकट काटेर खेल हेर्न मैदान आइरहेका थिए । उपहारमा पाएको रकम पढाइमा खर्च गर्ने उनले बताएका छन् ।