काठमाडौं । नेपाली कांग्रेसमा पदाधिकारी र निर्वाचन पद्धतिका विषयमा अझै पनि सहमति कायम हुन सकेको छैन । महासमिति बैठकमा पेस गर्न लागिएको विधान संशोधनको मस्यौदामा पदाधिकारी कति राख्ने र निर्वाचन पद्धति के हुने भन्ने विषयमा संस्थापन र इतर पक्षबीच सहमति कायम हुन नसकेको हो ।
कांग्रेस स्रोतका अनुसार पदाधिकारी ८ जना हुने विषयमा सहमति नजिक पुगेको भए पनि निर्वाचन पद्धति के हुने भन्ने विषयमा सहमति कायम हुन सकेको छैन । ८ पदाधिकारीमध्ये सभापति, उपसभापति–२, महामन्त्री –२, सहमहामन्त्री–२ र कोषाध्यक्ष राख्नेमा नजिक पुगेको एक नेताले बताए ।
केन्द्रीय समितिको बैठक अहिले केहीबेरपछि बस्नेछ । आइतबार सिंहदरबारमा भएका छुट्टाछुट्टै छलफलमा ८ पदाधिकारी राख्ने विषयको नजिक पुगेको भए पनि निर्वाचन पद्धतिमा फरक फरक मत देखिएको थियो ।
नेता रामचन्द्र पौडेल पक्षधरले पदाधिकारी सबै निर्वाचनमार्फत आउनुपर्ने अडान राखेको छ भने सभापति शेरबहादुर देउवा पक्षधरले एक–उपसभापति, महामन्त्री, सहमहामन्त्री र कोषाध्यक्ष गरी ४ पदाधिकारी सभापतिले मनोनित गर्ने व्यवस्था राख्नुपर्ने पक्षमा देखिएको छ ।
केन्द्रीय समितिको बैठकले यो विषय टुंगो लगाएर महासमितिमा पेस गर्ने तयारी छ । नेता पौडेलले विधानमा अझै पनि सहमति जुटिनसकेको बताए । उनले सबै पदाधिकारी निर्वाचित हुनुपर्ने आफ्नो अडान कायमै रहेको बताए ।
तस्बिर रासस