टोक्यो । जापानको उत्तरी शहर सापोरोमा रहेको एक पवमा गएको राति(आइतबार राति )बिस्फोट हुँदा ४२ जना घाइते भएका छन् । केहीको अवस्था नाजुक भएको होक्काइडोका प्रहरी अधिकारी रोहेई काशिहाराले बताएका छन् ।
बिस्फोटपछिको आगलागीका कारण एउटा भवन ढल्नुका साथै ग्यास गन्हाइरहेको स्थानीय बासिन्दाले बताएका छन् । सो क्षेत्रका भवनका झ्याल समेत फुटेका छन् । विस्फोटको कारण खुलेको छैन । बिस्फोट स्थानीय समयअनुसार राति ८ः३० बजे भएको थियो ।
प्रहरीको इमर्जेन्सी सर्भिसले विस्फोटनको अनुसन्धान गरिरहेको जनाइएको छ । भिडियोमा देखाइएअनुसार विस्फोटन निकै नै भयानक थियोे । बाटोमा क्षतविक्षत सामग्री निकालिएको छ । विस्फोटबाट झ्यालहरु नै पनि बाटोमा पुगेका छन् ।
आगो नियन्त्रणका लागि २० वटा फायर इन्जिनको प्रयोग गरिएको थियो । घाइतेको संख्या बढ्न सक्ने बताइएको छ । अर्को विस्फोटनको सम्भावनालाई लिएर फायर फाइटर्सहरुले स्थानीयलाई सचेत गराएका छन् । साप्रोमा झण्डै २० लाख मानिसको आवादी छ । (एजेन्सी)
