एजेन्सी । जर्दान साकिरीले बेन्चबाट दुई गोल गरेपछि लिभरपुलले म्यानचेष्टर युनाइटेडलाई ३-१ले  हराउँदै इङलिस प्रीमियर लिगको शीर्ष स्थानमा उक्लिएको छ । 

म्यानचेष्टर सिटीले शनिबार एभर्टनलाई पराजित गरेपछि लिभरपुललाई जित आवश्यक थियो । बैकल्पिक खेलाडी साकिरीले दोस्रो हाफमा बेन्चबाट गएर दुई गोल गरेपछि लिभरपुलले घरेलु मैदानमा तीन अंक पक्का गरेको हो । 
सडियो मानेले २४औं मिनेटमा गरेको गोलबाट लिभरपुलले अग्रता लिएको थियो । गोककिपर एलिसनले गरेको गल्तीमा युनाइटेडले बराबरी गोल फर्कायो । रोमेलु लुकाकुको क्रसलाई जेसे लिङ्गार्डले पोष्टको दिशा दिएका थिए । 
क्लोपले ७०औं मिनेटमा नाबी केइटाको स्थानमा साकिरीलाई छिराएपछि युनाइटेडलाई लिभरपुलको आक्रमण रोक्न कठिन भयो । मैदान छिरेको तेस्रो मिनेटमै गोल गरेका साकिरीले ८०औं मिनेटमा अर्को गोल थपेका थिए ।  
पाउल पोग्बालाई बेन्चमै थन्काएका जोजे माउरिन्होले मारोउने फेलानीलाई दोस्रो हाफको शुरूमै मैदान छिराए पनि उनी प्राभवकारी बन्न सकेनन् । 
"बलियो टोलीले जित्छ । तर उनीहरूले हामी भन्दा कमजोर भएको अवस्थामा जिते," युनाइटेडका प्रशिक्षक माउरिन्होले भने, "सुरूको २० मिनेट दुई टोलीबीच धेरै भिन्नता थियो । उनीहरू हामीभन्दा धेरै राम्रा थिए । त्यतिबेला उनीहरू जे पनि गर्न सक्ने अवस्थामा थिए । तर पछि उनीहरूको खेल खस्किसकेको थियो ।"
जितसंगै १७ खेलबाट ४६ अंक जोडेको लिभरपुल शिर्ष स्थानमा छ । जुन छैटौं स्थानमा रहेको युनाइटेड भन्दा १९ अंकले बढी हो भने दोस्रो स्थानको सिटीभन्दा १ अंकले बढी हो ।
"आज खेलाडीले असाधारण प्रदर्शन गरे । युनाइटेडको टिम हेरेपछि कसरी रोक्ने भन्ने भएको थियो," लिभरपुल प्रशिक्षक क्लोपले भने, "पहिलो गोल उत्कृष्ट रह्यो । साकिरीले उत्कृष्ट खेले । हामी जितका लायक थियोें ।"