बीबीसी । बितेको वर्ष अर्थात सन् २०१८ मा फेसबुकमाथि थुप्रैखाले आरोप लागेको हामीले देख्यौँ, सुन्यौँ । हामीले सुन्यौँ र पढ्यौँ पनि, फेसबुकले आफ्ना युजर्सको निजी डाटा बेच्न थालेको छ । यसबारे फेसबुकका संस्थापक मार्क जुकरबर्गले अमेरिकी सिनेटसामु सवालजवाफमा हाजिरसमेत हुनुपर्यो ।
फेसबुकले आफ्नो कमजोरी स्वीकार्दै यस्तो गल्ती नदोहोर्याउने प्रतिबद्धता जाहेर गर्यो । उसले विभिन्न बाचा गरे पनि प्रयोगकर्ताको मनमा फेसबुकप्रति आशङ्का भने कायमै छ । समग्रमा भन्नुपर्दा लामो समयदेखि फेसबुकले भोग्दै आएको सुखद समय २०१८ सम्मै कायम रह्यो । अब भन्न थालिएको छ, फेसबुकको खराब समय २०१९ मा सुरु हुनेवाला छ ।
अनुमान यो पनि गर्न थालिएको छ कि आगामी १२ महिनामा फेसबुकमाथि ठूलो जरिबाना हुन सक्छ । आयरल्यान्डको डाटा प्रोटेक्सन समितिले गत डिसेम्बरमा फेसबुकका विरुद्ध जाँच सुरु गर्ने घोषणा गरेको थियो । यसका अतिरिक्त अन्य कतिपय मुलुकले पनि फेसबुकमा आफ्ना नागरिकको डाटा असुरक्षित रहेको बताउँदै आएका छन् । यसकारण फेसबुकले गम्भीर नतिजा भोग्नुपर्ने दिन आउन सक्ने तिनको भनाइ छ ।
इन्टरनेसनल एसोसिएसन अफ प्राइभेसी प्राक्टिसनर्स (आईएपीपी) का निर्देशक केट कोलेरीले भने, ‘हाम्रो मुख्य उद्देश्य के हो भने, यस्ताखाले गडबडी नियन्त्रणका लागि सही उपाय अपनाइयोस् । र, यस्ता उपायले काम गरेनन् भने प्रशासनिकस्तरमै जाँच गर्नेछौँ ।’ समितिको फैसलाले फेसबुकलाई निकै ठूलो चुनौतीको भागिदार बनाउनसक्ने बताइन्छ ।
युरोपेली सङ्घको जनर डाटा प्रोटेक्सन रेग्युलेसन (जीडीपीआर)का अनुसार यदि फेसबुकले गल्ती गरेको प्रमाणित भयो भने उसले आफ्नो समग्र कमाइको ४ प्रतिशत हिस्सा जरिबानाका रुपमा तिनुपर्नेछ । यस हिसाबमा हेर्दा फेसबुकमाथि लाग्न सक्ने जरिबाना रकम १५० करोड अमेरिकी डलर हुनेछ ।