काठमाडौं । बलात्कारपछि हत्या गरिएकी कञ्चनपुरको भीमदत्तनगर–२ कि १३ वर्षीया किशोरी निर्मला पन्तका परिवारलाई सरकारले दिएको राहतमा विवाद भएको छ । निर्मलाको परिवारलाई केन्द्र सरकारले १० लाख, प्रदेश सरकारले ५ लाख र भीमदत्त नगरपालिकाले ३ राहत राहत रकम सहयोग गर्ने घोषणा गरेका थिए ।
उनीहरुले हालसम्म राहत बुझेका छैनन् ।, तर बुधबारमात्रै निर्मलाकी आमाले आफ्ना बाँकी दुई छोरीको भविष्यको लागि राहत बुझ्ने बताएकी थिइन् । निर्मलाका बुवा यज्ञराज पन्तले भने सरकारले दिएको राहत रकम बुझे दुर्गादेवीको घरको दैलोमा गएर आत्महत्या गर्ने चेतावनी दिएका छन् । यज्ञराजले सडकमै सबैको अगाडि दुर्गादेवीलाई धम्की दिएको भिडियो सार्वजनिक भएको छ । यज्ञराजले कान्छी श्रीमतीको रुपमा लक्ष्मी भट्टलाई भित्र्याएपछि १२ वर्षदेखि छुट्टै घरमा बस्दै आएका थिए । मजदुरी गरेर दुर्गाले छोरीहरुको व्यवस्थापन गर्दै आएकी थिइन् ।
राहतकै रकम बाँडफाँटको विषयमा अहिले निर्मलाको परिवारमा विवाद चुलिएको छ । स्थानीयले भने कान्छी आमा र बावुले राहत रकममा भाग खोजेपछि विवाद चुलिएको बताउँदै आएका छन् । निर्मलाकी आमा दुर्गाले डिएनए म्याच र राहत बुझ्ने बताएपछि निर्मलाका बाबु यज्ञराज र सोतैनी आमा लक्ष्मीले राहत बुझेकै दिन दुर्गाकै घरमा आएर आत्महत्या गर्ने घोषणा गरेको स्थानीयको आरोप छ । यज्ञराजकी कान्छी श्रीमतीले भने राहत रकममा भाग नखोजेको बताइन् । उनले भनिन्, ‘‘न्याय नपाएसम्म राहत बुझ्दैनौं । यदि दुर्गा (निर्मलाकी आमा) ले राहत बुझे उहाँले (यज्ञराजले) घरमै गएर आत्महत्या गर्छु भन्नुभएको छ ।’’
निर्मलाकी आमा दुर्गाले डिएनए म्याचका लागि रगत दिएसँगै राहत बुझ्ने बताएपछि यज्ञराजले उनलाई भोलिपल्टै यस्तो चेतावनी दिएका हुन । बुधबार निर्मलाकी आमा दुर्गाले प्रहरीमा निवेदन दिएर निर्मलाकै योनीबाट भेजाइनल स्वाब निकालिएको हो वा होइन भनी यकिन गर्नका लागि रगतको नमुना दिएकी थिइन् ।
निर्मलाका बावु यज्ञराज र सौतेनी आमा लक्ष्मीले घरपरिवारसँग सल्लाह नै नगरी अरुले उस्काएको भरमा रगत दिएको र राहत बुझ्न राजी भएको आरोप लगाएका छन् । तर, निर्मलाकी आमा दुर्गाले न्याय पर्खिंदा–पर्खिंदा दुई छोरीमाथि पनि अन्याय हुने भएकाले राहत बुझेर छोरीको भविष्य बनाउने भन्दै राहत बुझ्ने बताएकी थिइन् ।