काठमाडौं । नयाँ तथा पुराना कविहरुलाई कविता वाचनका लागि मञ्च प्रदान गर्दै आएको ‘हामी’ कविताको मासिक श्रृंखलामा माघको पहिलो दिन कविहरु रुपेश श्रेष्ठ र प्रज्जवल अधिकारी प्रस्तुत भए । दुवै कविले आफ्ना आठ–दश वटा कविता वाचन गरे ।
काठमाडौंको कालिकास्थानस्थित सर्वनाम नाटक भवनमा मंगलबार आयोजित हामी कविताको प्रारम्भमा कवि प्रज्जवल अधिकारीले आफ्ना केही लामा छोटा कविता सुनाए । उनले ‘माखो’ शीर्षकको कविता वाचन गरे–
एउटा माखो यता उता उडिरहेछ
दूर्गन्ध फैलाई रहेछ
म मार्न खोजी रहेछु
सकिरहेको छैन
मेरो हातमा बन्दुक छ
तर पनि अशमर्थ छु म
यतिबेला उ
मेरो देशको निधारमा गएर बसेको छ ।
यसका अतिरिक्त उनले बैराग, छाउपडी, रहर, अतिथि देवो भवः, आमाको दीक्षान्तमा, मौन युद्ध, निदाउलान् त अभि लगायत शीर्षकका कविता वाचन गरे ।
कार्यक्रमको दोस्रो चरणमा कवि रुपेश श्रेष्ठले पहिलो कविता सुनाए, ‘एक पुरुषको वकपत्र’ ।
कक्षा एकमा नम्बर एकमा
कक्षा कार्य सकेर
जब सानले माडसा’बको टेबुलमा कापी अघि सारेँ
चस्माको डील माथि सारेर घुरेर माडसाबले भन्नु भयो
हट् । लेडिज् फस्र्ट
हो, त्यै दिनबाट जिन्दगीका हरेक लाईनहरुमा
अन्तिममा उभिने गरेको पुरुष हुँ म ।
यो कवितसँगै कवि रुपेशले देउता रिसाएको बेला, म त रात हुँ, स्टालिनहरु, छोरा घर त गयो, तिर्खा, समुद्र किनार लगायत शीर्षकका कविताहरु प्रस्तुत गरे ।
लूनकरणदास–गङ्गादेवी चौधरी साहित्यकला मन्दिर र सर्वनामको संयुक्त आयोजनामा हरेक महिनाको पहिलो दिन आयोजन हुँदै आएको हामी कविता वाचन श्रृंखलाको ६३औं भागमा कविता वाचन गर्न आएका कविहरुलाई सर्वनामका प्रमुख अशेष मल्लले स्वागत गरेका थिए ।
हामीको ६३औं अंक प्रस्तुत भइसक्दा हामी कहाँ कविता वाचन र सुुन्ने संस्कृतिको विकास भएको अशेष मल्ल बताउँछन् । बाह्रखरीसँग कुरा गर्दै मल्लले भने, ‘कविको मात्रै होइन, कविता सुन्ने दर्शकको लेभल पनि उस्तै रहेको अहिलेका कविता र दर्शकको उपस्थितिले देखाएको छ । जे होस्, कवितालाई सम्मान गर्ने अवस्था आएको छ भन्न सकिन्छ ।’