एजेन्सी  । युभेन्टस र एसी मिलानले आज राती सुपरकोपा इटालियनाको उपाधिका लागि खेल्दैछन् । इटालीयन फुटबलका महारथी दुबै टोली अहिले कीर्तिमानी आठौं उपाधिका लागि साउदी अरेबिया भ्रमणमा छन् । 

सुपरकोपा इटालियनामा इटालियन सिरी ‘ए’ विजेता र कोपा इटालियाको विजेताले प्रतिस्पर्धा गर्नेछन् । पछिल्लो समय इटालियन फुटबलमा राज गरेको युभेन्टस सिरी ‘ए’ विजेता हो भने मिलान कोपा इटालियाको उपविजेता हो । गत सिजन कोपा इटालियाको उपाधि पनि युभेन्टसले जितेको थियो ।

यो प्रतियोगितामा युभेन्टस र मिलानले बराबरी ७/७ पटक उपाधि जितेका छन् । पछिल्लो पटक कतारको दोहामा दुई टोली आमने सामने हुँदा मिलानले टाइब्रेकरमा युभेनटसलाई ४–३ ले हराउँदै उपाधि जितेको थियो । युभेन्टस अघिल्लो सिजन पनि लाजियोसँग पेनाल्टी सुटआउटमा पराजित भएको थियो । युभेन्टसले यो प्रतियोगिताको उपाधिका लागि खेल्न लागेको यो लगातार सातौं पटक हो । 

“हामी पछिल्लो दुई वर्ष मिलान र नेपोलीसँग पेनाल्टी सुटआउटमा पराजित भयौं । आशा छ बुधबार राती हामी फरक नतिजा निकाल्छौं,” युभेन्टसका प्रशिक्षक मासिमिलियानो एलेग्रीले भने, “सिरी ए मा हामी २२ अंकले अगाडी छौं । तर यहाँ त्यसको अर्थ हुदैन । लिग र यो फरक खेल हो । आशा छ खेल अतिरिक्त समयसम्म लम्बिदैन ।”

पछिल्लो समय लिगमा गरेको प्रदर्शन हेर्ने हो भने युभेन्टस उपाधिको बलियो दाबेदार हो । पछिल्लो पटक गत नोभेम्बरमा पनि युभेन्टसले सान सिएरोमै मिलानलाई २–० ले पराजित गरेको थियो । उक्त खेलमा मारियो मान्जुकिच र क्रिष्टियानो रोनाल्डोले गोल गरेका थिए ।

इटालियन सिरी ‘ए’ मा युभेन्टस अहिलेसम्म अपराजित रहेको छ । लिगमा साविक विजेता युभेन्टस शीर्ष स्थानमा छ भने मिलान पाँचौं स्थानमा छ । मिलानले १९ खेलमा ७ बराबरी खेलेको छ भने ४ खेलमा पराजय बेहोरेको छ । तथापी मिलानले पछिल्लो पाँच खेलमध्ये १ खेलमा मात्र पराजित भएको छ । 

तथापी चोटका कारण मारियो मान्जुकिच बुधबार राती टोलीमा उपलब्ध हुनेमा शंका छ । युभेन्टसमा हुवाँ कोउड्राडो र आन्द्रेय बरजाग्ली पनि टोलीमा हुनेछैनन् । युभेन्टसले कोपा इटालियामा बोलोग्नाविरुद्ध खेल्दा टोलीमा व्यापक परिवर्तन गरेको थियो । त्यसैले यस प्रतियोगिताको फाइनलका लागि पनि युभेन्टसले टोलीमा परिवर्तन गर्ने विश्वास गरिएको छ । पछिल्लो ६ खेलमा मिलानले युभेन्टसलाई हराउन सकेको छैन ।