काठमाडौं । निर्देशक गोविन्द सिंह भण्डारी, निर्माताद्वय दीपेन्द्र रेग्मी र गोमा विष्ट थापाले फोन गरे । फोन चलचित्र अफरका लागि थियो । वन लाइन स्टोरी मन पनि पर्यो । भेट भयो । भेटमा पनि स्टोरी चित्त बुझ्यो । स्क्रिप्ट ठिक लाग्यो ।
तर, चुनौती थियो, चलचित्र काँधमा बोक्नुको । साथमा थिए अभिनयका उस्ताद हरिहर अधिकारी, टीका पहारी, रबी गिरी जस्ता कलाकार । त्यो भन्दा पनि ठूलो चुनौतीको पहाड थिए– प्रशान्त ताम्राकार ।
अभिनयका उस्ताद हरिहर, टीका, रवी भए पनि उनीहरु चरित्र अभिनयमा सीमित थिए । तर प्रशान्त थिए उनीसँग भिडन्त गर्ने । जसको ज्यान नै अजङ्गको छ । खलपात्रको जस्तै । खलपात्रका लागि प्रशान्तलाई उभ्याइदिए मात्रै पुग्छ । मेकअपको कुनै जरुरत पर्दैन ।
साउथ इन्डियन मुभीको फ्लेवर आउने चलचित्र थियो । नाम हो, ‘रणवीर’ । भिडन्त हुने नै भयो । त्यो पनि प्रशान्तसँग ।
निर्देशकले भने, ‘‘सुशील (सिटौला) ज्यान चाहिँ बनाउनु पर्छ । यसका लागि तिमीसँग करिब ४ महिना समय छ ।’’
कथा राम्रो लागेकाले नाईं भन्न सकेनन् । ‘हुन्छ’ भनेर फर्किएका सुशीलले भोलि पल्टबाटै जिम सुरु गरे । बिहानै दिनको ८ वटा अण्डा, भिजाएको चना, फलफुल र त्यसको जुस, जिम प्रोटिन अनि क्लिन फुड नियमित खान थाले । जिम अनुशासनमा बसे । सफलता हात लाग्यो । बडी तथा आर्म्स बन्यो । लुरे ज्यान सिक्स प्याकमा परिणत भयो ।
बलिउडमा उनले सुनेका थिए, कहिले आमिर खानले ज्यान बढाएको त कहिले घटाएको । रणवीरले सञ्जय दत्तको वायोपिक गर्दा उस्तै देखिन ज्यान बनाएको र बढाएको सुनेको त पुरानो पनि भएको थिएन । नेपालमै केकी अधिकारीले ‘ऐश्वर्य’का लागि ७ केजी तौल घटाएको पनि हल्का फुल्का सुनेका थिए ।
सुशीललाई तौल बढाउनु मात्रै थिएन । बनाउनु पनि थियो । कम्तीमा प्रशान्तसँग टक्कर लिन सक्ने देखिने खालको । साढे तीन महिनाको अनवरत प्रयासपछि उनी १५ केजी तौल बढाएर ७५ केजी पुगे ।
तर, सजिलो थिएन । आवश्यक सबै कुरा चाहेर पनि जुटाउन नसकिने अवस्था विद्यमान थियो । “सजिलो छैन हामी नेपालीका लागि जिम गएर तत्काल शरीर बढाउन आवश्यक कति कुरा जुटाउन गाह्रो छ,” सुशील सम्झिन्छन्, “दाल भात खाएरै भए पनि ज्यान बढाउन निकै प्रेसर हुन्छ । बलिउड र हलिउडको कुरा छाडौं, हाम्रै नेपाली कलाकार सुशील श्रेष्ठ लगायत केहीले कसरी बडी बनाउनु भएको रहेछ ? फिल भयो स्यालुट गर्छु म उहाँहरुलाई ।”
चलचित्रको छायांकन सुरु भयो । प्रशान्तसँग उनले सेटमा कयौं पटक लडे । केही भिडन्त त ट्रेलरमा पनि देखिएको छ । “चलचित्र मेरा लागि ठूलो चुनौती थियो । एकातिर म अभिनयका उस्तादहरुसँग अभिनय गर्दै थिएँ । अर्कोतिर एक्सन चलचित्रमा हाल्दै थिएँ,” सुशील बाह्रखरीसँग भन्छन् ।
सुशीलले यसअघि थुप्रै चलचित्रमा को–एक्टरको रुपमा काम गरे पनि सिंगो कथा बोकेर हिँडेको भने ‘रणवीर’ नै पहिलो चलचित्र हो । त्यसैले उनी यो चलचित्रलाई डेब्यू भन्दा पनि फरक नपर्ने बताउँछन् ।
अभिनयमा आधा शताब्दी विताइसकेकाहरुसँगको अभिनय गरेका कारण तथा एक्सन र लिड रोलमा रहेको पहिलो चलचित्र पनि भएकाले ‘रणवीर’ उनका लागि चुनौतीपूर्ण पनि छ । गोविन्द सिंह भण्डारीले निर्देशन गरेको चलचित्रलाई गोमा विष्ट थापा र दीपेन्द्र रेग्मीले निर्माण गरेका हुन् । चलचित्र माघ १८ गते रिलिज हुँदैछ ।
साउथ इन्डियन चलचित्रसँग तुलना गर्नुलाई सुशील चलचित्रको सफलता ठान्छन् । “चलचित्र भनेको निर्देशकको हो । उहाँ साउथमा बसेर काम गरेकाले केही प्रभावित भएको हुनुपर्छ,” सुशील भन्छन्, “स्टोरी, स्क्रिनप्ले सबै मन परेर मैले काम गरेको हुँ । हाम्रो कथा छ । ‘रणवीर’लाई साउथ इन्डियनमा डब गरिदिने हो भने यो त्यहीँको चलचित्र बन्छ । त्यो लेवल चलचित्रले मेन्टेन गरेको छ ।”